Kä cu ruac Kuɔth Nhial ben kä ɣä wëë i̱, “Thok ɛmɛ, bɛ te ni gääkä. /Ca jɛ bi lɛp, kä thilɛ ram mi bi wä rɛc kɛ jɛ, kɛ ɣöö ci Kuoth Nhial ni Kuoth I-thɛ-rɛl wä rɛc kɛ jɛ. Kɛ kui̱ ɛmɔ, jɛn bɛ te ni gääkä.
Kä cu wut ɛmɔ ɣä nööŋ kɛ duɔ̱ɔ̱p in te kui̱c caam nhiam luaak Kuɔth. Kä min cä guic, cua̱ buay Kuɔth Nhial nɛn cɛ luaak Kuɔth Nhial thiäŋ, kä cua̱ tɛɛthni buupä.
Kä cu ruac Kuɔth Nhial ben kä ɣä wëë i̱, “Gat ran, ji̱n gui̱cni agɔaa, kä li̱ŋni agɔaa kä päli ji̱thku piny, kɛ tin diaal tin bä la̱r ji̱ kɛ kui̱ ŋuɔ̱tni luaak Kuɔth Nhial kɛnɛ luëëkɛ diaal. Kä ji̱n tit nɛy tin ba nhök wä luaak Kuɔth kɛnɛ nɛy tin /ca bi nhök wä luaak Kuɔth.
kɛ nhökdun kɛ nɛy ti thil kuoth ben rɛy luaakdä, kɛ nɛy ti /ka̱n lo̱ckiɛn kɛnɛ pua̱nykiɛn cuɛl, kɛ ɣöö ba luaakdä ben ya̱r, mi tho̱p yɛn ɣä mi̱ethdä, thiɔl kɛnɛ riɛm. Cia mat ruacdä ya̱r kɛ lätkun diaal tin jiäk.
Kɛn bikɛ lät rɛy luaakdä, kä bikɛ thuk luaakdä yien, kä bikɛ lät rɛy luaak. Kɛn bikɛ muc tin waŋkɛ ŋuɔ̱t, kä bikɛ luuri thöp kɛ kui̱ nath, kä bikɛ kɛ tit kä bikɛ kɛ lätikä.
Kɛn /cikɛ bi ben nhiamdä, kɛ ɣöö bikɛ ɣä ben lät ikä ala bööth palä. Kä /cikɛ bi ben thieekä mucnikä tin gɔw, kɛn ŋɔak tin rɛl gɔɔydiɛn rɔ̱. Duundɛ ɣöö bikɛ pöcdiɛn rut kɛnɛ lät tin jiäk tëë cikɛn kɛ la̱t.
Ɛn wa̱nɔ, cu Kuäär ni Kuoth Nhial mɛmɛ lar wëë i̱, “Bi ji̱ Lii-bay tin la bööth palä, tin la kuay Dha-dok tëë lät rɛy luaak Kuɔth mëë ci ji̱ I-thɛ-rɛl diaal kac raar kä ɣä, ben thiäkädä kä bikɛn ɣä lätikä. Bikɛ ɣä thöp muc thiɔaal kɛnɛ muc riɛm, ruac ni ɣän Kuäär ni Kuoth Nhial.
Mi wäkɛ wä rɛy kal in te rɛci, bikɛ la̱th ni bi̱i̱ in ca tak agɔaa. Thilɛ bi̱i̱ miemni mi bikɛn ɛ la̱th pua̱nynikiɛn, guäth in lätkɛ thukni käli kal in te rɛci.
Kä mi wäkɛ wä kä naath rɛy kal in te raar, bikɛ bieyni tin lätkɛ kɛ ka̱m raar, bikɛn kɛ la̱th duëli tin rɛl gɔɔydiɛn rɔ̱. Kä bikɛ bieyni ti kɔ̱ŋ cu la̱th, kɛ ɣöö /ci ciaŋ bieyni in rɛl rɔ bi cop kä naath.
Kä /cikɛ ciek jɔkä bi kuɛn, kä /cikɛ kɛ̈ɛ̈ bi kuɛn. Bikɛ kuɛn ni nyam mi la nyal mi la kuay thuɔk duëël I-thɛ-rɛl pa̱ny kɛnɛ ciek jɔkä mi cɔwdɛ mɔ bo̱o̱th palä.
Kä mi cɛ tekɛ rɔal mi ci tuɔɔk, kɛn bikɛ lät ce̱tkɛ kua̱r luɔ̱k bä, bikɛ luk ŋok ce̱tnikɛ lukdä. Kä bikɛ luëëkä käp kɛnɛ ŋuɔ̱t kɛ gua̱th ti̱mnikä diaal, kä bikɛ ca̱ŋ lɔ̱ŋnikä tit ala mi rɛl rɔ.
Kä /cikɛ rɔ̱ bi ya̱r kɛ wä gekä raam mi ci li̱w. Ɛ ni mi ɛ gua̱n kiɛ man kɛnɛ mi ɛ gatdɛ kiɛ nyaadɛ kɛnɛ mi ɛ däman kiɛ nyiman mi ŋot a /ka̱n kuɛn ci li̱w ɔ, ɛ jɛn bikɛ rɔ̱ kulɛ ya̱rɔ.
Kä kɛ jɛn cäŋ in bi wee kɛ jɛ guäth in rɛl gɔɔydɛ rɔ, rɛy kal in te ni rɛci, a bɛ wä lät guäth in rɛl gɔɔydɛ rɔ, bɛ muc dui̱rädɛ cu thöp, ruac ni ɣän Kuäär ni Kuoth Nhial.
Kä dɛy jiɛn diaal tin jio̱l kä dɛy jiɛn diaal tin gööl, kɛnɛ muc diaal tin la thöpɛ kä muckun, bɛ a duŋ bööthni palä. Kä bia nupdun in nhiam la thöpɛ bööth palä, kɛ ɣöö dɔ̱ŋ bi puɔ̱th kulɛ te ciëëŋnikun.