Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Dundɔŋ ni dunoli din kpa wulimpuhili polo la din’ kul yɛn yomi ʒiɛya dabisa ayɔbu din nyɛ tuma tumbu dabisa la ni. Amaa Vuhim Dabisili dali mini goli palli tuuli dabisili dali, di simdi ni di yooi.
Naa ni ti dolila samban’ ni n-kpe zɔntua din be dunɔdal’ la ni nti zani baɣili dunɔdali dunɔpaɣira. Maligumaana ni ti mal’ o sara shɛli bɛ ni zaŋdi nyɔri buɣim la min’ o biɛrisuntali sara maligunima, ka di simdi ni maligumaana maa kurim dunɔdali maa dunɔbia zuɣu; di nyaaŋa ka o yi. Amaa di bi simdi ni bɛ yo dunɔdali maa hal ni zaawuni.
Naa ni yɛn zaŋdi binshɛŋa maani bɛ ni zaŋdi sara shɛli nyɔri buɣim la tiri Yawɛ Vuhim Dabisili dali nyɛla piɛbih’ ayɔbu bɛn ka dansi mini piɛlaa ŋun ka daŋa.
Di simdi ka chi mini kawana sara din yɛn pahi piɛlaa maa zuɣu nyɛla lita pinaayopɔin ni pirigili. Ka chi mini kawana sara din yɛn pahi piɛbihi la zuɣu dina, o kul bom’ o ni bɔri ni o ti shɛm tariga, ka bo kpam lita ata tahili kam zuɣu.
Chi sara dina, o bom’ chi lita pinaayopɔin ni pirigili pahi naɣilaa zuɣu, ka bo chi lita pinaayopɔin ni pirigili pahi piɛlaa zuɣu, o ni kul bɔri shɛm tariga ti, ka lan bo kpam lita ata pali pahi chi tahili kam zuɣu.
Tiŋgbɔŋ maa ni niriba yi kana ni bɛ ti jɛm Yawɛ chuɣu dali, ŋunkam ti doli nuzaa polo dunɔdali kpe nti jɛm’ o, ŋun doli nudirigu polo dunɔdali yi. Ka ŋunkam mi ti doli nudirigu polo dunɔdali kpe, ŋun doli nuzaa polo dunɔdali yi. Bɛ di ti lan doli bɛ ni doli dunɔdali shɛli kpe na maa yi, amaa bɛ kul doli bɛ nini ni tuhi dunɔdali shɛli yi.
Churi puhibu ni mini bɛ ni zali saha shɛŋa ni, o ti bom’ chi lita pinaayopɔin ni pirigili pahi naɣila’ polli zuɣu, ka lan bo chi lita pinaayopɔin ni pirigili mini piɛlaa, ka bo piɛbihi pola, o ni kul bɔri shɛm tariga. O ni lan bo kpam lita ata chi tahili kam zuɣu.
Naa yi ti bo o suhuyubu sara, di yi nyɛla bɛ ni zaŋdi sara shɛli nyɔri buɣim la bee omaŋmaŋ’ biɛrisuŋ sara din yi o suhuyubu ni na ti Yawɛ, bɛn’ yoomi dunɔdali din kpa wulimpuhili polo la ti o ka o mali o sara shɛli bɛ ni zaŋdi nyɔri buɣim la bee omaŋmaŋ’ biɛrisuŋ sara kaman o ni yi niŋdi shɛm Vuhim Dabisili dal’ la. Di nyaaŋa ka o yi. O yi ti naai, ka bɛ yo dunɔdali maa.
O lan bom’ zim viɛlli kilɔgiram ayi sara pahi di zuɣu asiba kam pari taba, ni kpam lita yini n-zaŋdi ŋmiriti zim viɛlli maa m-mali chi sara ti Yawɛ. Dimbɔŋɔ nyɛla zaligu din yɛn ʒiɛya sahakam.
Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Naa yi zaŋ o ni su shɛli ti o bidibisi pini, di simdi ni di leeg’ o bidibisi maa dini, ka di nyɛ bɛ fali shɛli bɛ ni yɛn su,
amaa o yi zaŋ o ni su shɛli ti o tumtumdiba ni yino pini, di ni nyɛ o dini hal ni faako yuuni, di nyaaŋa ka o labisi li ti naa. O bidibisi kɔŋko n-ni tooi su o ni zaŋ binshɛli ti ba pini.
Di bi simdi ka naa ti deei niriba maa tiŋgbani ka kari ba di ni. O ti zaŋmi omaŋmaŋ’ ni su tiŋgban’ shɛli ti o bidibisi din ni chɛ ka n niriba ni so ti ku kɔŋ o tiŋgbani.”
Di nyaaŋa ka o daa zaŋ ma doli duno’ shɛli din daa be dunɔdali luɣili zuɣu la yi n-chaŋ nuzaa polo du’ kasi shɛŋa din nyɛ maligumaaniba duri la ni, nimaani ka n daa nya luɣ’ shɛli din daa be wulinluhili polo tariga la.
Ka o daa yɛli ma, “Kpe ka maligumaaniba yɛn duɣiri taali sanyoo sara min’ alahichi sanyoo sara binyara, di lan nyɛla luɣ’ shɛli bɛ ni yɛn shɛri chi sara binyara din ni chɛ ka bɛ ku zaŋ li yi dundɔntitali ni, ka zaŋ kasitali chaŋ niriba maa sani.”