Okẹnnyẹ ahụn rị a ghọsị m ihiẹn nọ wekinhẹn m imẹ Ụlọ-nsọ, we shi ebe wẹ gha a banye Ụlọ-NSỌ kẹti-kẹti: E lee mirin rị a mụpụha okpuru ọnụmụzọ Ụlọ-NSỌ! Ọ hụ e hushi ibe ọwụwa-ẹnyanwụn, azụụn hụ Ụlọ-NSỌ bu ihun zinmẹ. Nkọ ndịdan Ụlọ-NSỌ k'ọ ghachanrịn rị e hupụha, e hughafezi ukpo nchụn-ẹjan nkọ hụ.
Okẹnnyẹ hụ nọ gha ọnụ-mgbọn rị ẹbamịn-ugu wepụha m, we m ghahunmẹ d'a pụha ihun ọnụ-mgbọn ibuzọ Ụlọ-nsọ hụn bu ihun zinmẹ ẹbamịn ọwụwa-ẹnyanwụn: e lee mirin nwẹn k'ọ gha nkọ ndịdan ebẹhụ e hupụha ẹkẹrẹ-ẹkẹrẹ.
Okẹnnyẹ hụ nọ dọn ihun ẹbamịn ọwụwa-ẹnyanwụn, gi ẹgbe o gi a ma ihiẹn makọ jẹnkọ. Ọ mapụ amụkụ ọgụn-mmisẹn kwasị nnụ (700) wụ kubiti nnụ-uku, ọ nọ we m gha imẹ mirin hụ: o ru m olu-ụkụ;
ọ mazị amụkụ ọgụn-mmisẹn kwasị nnụ, o wezi m gha imẹ mirin hụ: o ru m mkpụkụ; ọ mazị amụkụ ọgụn-mmisẹn kwasị nnụ, o wezi m gha imẹ mirin hụ: o ru m ukun.
Ọ nọ sị m, “Mirinni hushikọ ẹbamịn ọwụwa-ẹnyanwụn. O ru, ọ kpọtu shi Ọdanmgbugbu Araba. O k'a gha ebahụn huye Ohimin Nwụnnị; o sikọ d'e mẹ mirin ohimin hụ rị mma.
Wẹ k'a gha e gbu azụn imẹ ẹ, ghakwọrị alị Ẹn-Gẹdi d'e ru Ẹn-Ẹglaim, ẹgbẹrẹ hụ ile a wụrụ ebe ndị e gbu azụn a tanmasọnmẹ ọga wẹ gi e gbu azụn. Ụdị azụn bu ọda k'a rị a, nọkẹ ndị hụ rị Ohimin Uku wụ Mẹditerenia.
“Ụdị osisi ọwụlẹ a mị mkpụrụ w'e ri k'a rị e sue mkpẹnrẹn iyini azụụnnị lẹ azụụnnị. Agbụkọ wẹ ẹhụhụọ, mkpụrụ agụkọ elu wẹ. Ifọn ile kẹ w'e gi a mị mkpụrụ, makẹni mirin wẹ rị a ra gha Ụnọ-NSỌ e hupụha. Mkpụrụ wẹ k'a wụ ihiẹn-oriri, ẹhụhụọ wẹ a wụrụ ọgụn.”