ती मानिसले मलाई फर्काएर मन्दिरको प्रवेशद्वारमा लगे। प्रवेशद्वार मुनिबाट पानी बाहिर निस्किरहेको थियो र पूर्वपट्टि बग्दै थियो। मन्दिरबाट निस्केर वेदीको दक्षिणपट्टिबाट बगेर गएको थियो।
त्यसपछि ती मानिसले मलाई उत्तरको मूल-ढोकाबाट निकालेर मन्दिरको क्षेत्रको बाहिर लगे र घुमाएर पूर्वपट्टिको मूल-ढोकामा पुर्याए। ढोकाको दक्षिणपट्टि एउटा सानो खोला बगिरहेको थियो।
खोला जहाँ-जहाँ बगेर पुग्दछ, त्यहाँ हरेक किसिमका जीवित प्राणी र माछाहरू जिउनेछन्। त्यस खोलाले मृत-सागरसम्मको पानी सफा पार्नेछ र जहाँ-जहाँ त्यो बहनेछ, त्यहाँ हरेक चीज बाँच्नेछ।
नदीका दुवै किनारमा सबै प्रकारका रूखहरू उम्री फल दिनेछन्। तिनीहरूका पातहरू कहिल्यै ओइलाउनेछैनन् र फल बाह्रै मास फलिरहनेछन्। हरेक महिना तिनीहरूमा नयाँ-नयाँ फल लाग्नेछ किनभने तिनीहरूलाई मन्दिरबाट बगिआउने खोलाको पानीले भिजाउनेछ। ती रूखहरूले खानको निम्ति फल दिनेछन् र तिनका पातहरूले मानिसहरूको रोग निको पार्नेछन्।”
“पूर्वीय सिमाना दमस्कस र हौरानका इलाकाहरू बीचको एक ठाउँबाट दक्षिणतर्फ जानेछ र यर्दन नदी हुँदै मृत-सागर भएर तामारसम्म पुग्नेछ। यर्दन नदीको पश्चिममा इस्राएल देश र पूर्वमा गिलाद पर्छ।
“दक्षिणको सिमाना तामारदेखि दक्षिण पश्चिम हुँदै र कादेश मेरीबाको मरुद्यान भएर उत्तर पश्चिम हुँदै मिश्रको सिमाना सँगसँगै गएर भूमध्य सागरसम्म पुग्नेछ।
त्यो सधैँभरिको लागि तिमीहरूको हिस्सा हुनेछ। जमिन अंश-बन्डा लाउँदा तिमीहरूका माझमा बास गर्ने विदेशीहरू र तिनीहरूबाट जन्मेकाहरूलाई पनि आ-आफ्ना हिस्सा दिनू। तिनीहरूलाई पूरै इस्राएली नागरिकसरह मान्नू र तिनीहरूका नाममा पनि इस्राएलका कुलहरूका साथ जमिनको निम्ति चिट्ठा हाल्न दिनू।