خداوند فرمايو تہ ”هر هڪ قبيلي کي ملڪ مان پنهنجو پنهنجو حصو ملندو، جيڪو اوڀر واري سرحد کان ويندي اولهہ طرف ڀونوچ سمنڊ تائين هوندو. انهن حصن جي ورهاست بني اسرائيل جي ملڪ جي اتر پاسي واري سرحد کان شروع ٿيندي، جيڪا ڀونوچ سمنڊ کان وٺي حتلون شهر جي رستي سان حمات لڪ کان ويندي حصرعينان شهر تائين هوندي، ۽ جنهن جي اتر ۾ دمشق ۽ حمات جا علائقا آهن. ملڪ جي اترئين علائقي ۾ جن قبيلن کي حصا ڏنا ويندا سي اتر واري سرحد کان ڏکڻ طرف ويندي ملڪ جي وچ واري حصي تائين هن ترتيب سان مقرر آهن: دان، آشر، نفتالي، منسي، افرائيم، روبن ۽ يهوداہ.“
خداوند فرمايو تہ ”ملڪ جو وچ وارو حصو جيڪو يهوداہ واري علائقي جي ڏکڻ طرف هوندو، تنهن کي اوهين وقف ڪري ڇڏجو. انهيءَ جي ويڪر اتر کان ڏکڻ تائين ساڍا ٻارهن ڪلوميٽر هوندي ۽ ڊيگھہ ملڪ جي اوڀر کان اولهہ تائين ايتري ماپ جي هوندي جيتري قبيلن کي ورهايل حصي جي هوندي. هيڪل انهيءَ حصي جي وچ ۾ هوندي.
ڪاهنن جي انهيءَ حصي سان لڳولڳ اتر طرف لاوين جو حصو هوندو، جنهن جي ڊيگھہ اوڀر کان اولهہ طرف ساڍا ٻارهن ڪلوميٽر ۽ ويڪر اتر کان ڏکڻ طرف پنج ڪلوميٽر هوندي.
باقي جيڪو حصو منهنجي لاءِ مخصوص ٿيل ايراضيءَ جي ڏکڻ ۾ هوندو، جنهن جي ڊيگھہ اولهہ کان اوڀر طرف ساڍا ٻارهن ڪلوميٽر ۽ ويڪر اتر کان ڏکڻ طرف اڍائي ڪلوميٽر هوندي، سو مون لاءِ مخصوص نہ هوندو. اهو بني اسرائيل جي عام ماڻهن جي رهڻ لاءِ هوندو، جنهن جي وچ ۾ هڪڙو شهر هوندو ۽ ان جي ٻنهي پاسن کان سرسبز ٻنيون هونديون.
شهر جي اولهہ ۽ اوڀر ۾ باقي ڇڏيل زمين، جيڪا مون لاءِ مخصوص ٿيل ايراضيءَ جي ڏکڻ پاسي هوندي ۽ جنهن جي ماپ اولهہ توڙي اوڀر طرف پنج ڪلوميٽر ڊيگھہ ۽ اڍائي ڪلوميٽر ويڪر هوندي، سا شهر جي ماڻهن لاءِ پوک ڪرڻ واسطي هوندي.
سو ملڪ ۾ وقف ڪيل حصي جي وچ واري پوري ايراضي ساڍا ٻارهن ڪلوميٽر ڊگھي ۽ ساڍا ٻارهن ڪلوميٽر ويڪري يعني چورس هوندي. انهيءَ ۾ مون لاءِ مخصوص ٿيل ايراضي ۽ شهر ۽ ان جي آسپاس جون ٻنيون شامل هونديون.
خداوند فرمايو تہ ”انهيءَ وقف ڪيل وچ واري حصي کان وٺي ملڪ جي ڏاکڻي سرحد تائين، باقي ٻين قبيلن کي جيڪي حصا ڏنا ويندا سي هن ترتيب سان مقرر آهن: بنيامين، شمعون، اِسڪار، زبولون ۽ جد. هر ڪنهن جو حصو اوڀر واري سرحد کان ويندي اولهہ طرف ڀونوچ سمنڊ تائين هوندو.
شهر جي چوڌاري جيڪا ڀت هوندي تنهن جي هر پاسي واري ڀت جي ماپ سوا ٻہ ڪلوميٽر هوندي ۽ هر هڪ ڀت ۾ ٽي ٽي دروازا هوندا. اهڙيءَ طرح شهر کي ڪل ٻارهن دروازا هوندا. انهن سڀني دروازن کي بني اسرائيل جي ٻارهن ئي قبيلن جا نالا ڏنل هوندا. اتر پاسي واري ڀت ۾ روبن، يهوداہ ۽ لاويءَ جي نالن جا دروازا هوندا. اوڀر پاسي واري ڀت ۾ يوسف ، بنيامين ۽ دان جي نالن جا دروازا هوندا. ڏکڻ پاسي واري ڀت ۾ شمعون، اِسڪار ۽ زبولون جي نالن جا دروازا هوندا. اولهہ طرف واري ڀت ۾ جد، آشر ۽ نفتاليءَ جي نالن جا دروازا هوندا.