Wosẽ to ɖe nye sewo ŋu vloe wu dukɔwo, eye ɖe nye ɖoɖowo ŋu wu anyigba, siwo ɖe to ɖe wo godoo; elabena wogbe nye seawo, eye womezɔ ɖe nye ɖoɖowo nu o.
Eyata ale Aƒetɔ Yehowa gblɔ esi: Esi miesẽ to wu dukɔ, siwo ƒo xlã mi godoo, miezɔ ɖe nye ɖoɖowo nu o, eye miewɔ nu ɖe nye sewo nu, ʋuu kekeke miahayi nu wɔ ge ɖe dukɔ, siwo ƒo xlã mi godoo ƒe sewo nu o la,
Eyata ale Aƒetɔ Yehowa gblɔ esi: Metà ɖokuinye ƒe agbe, esi netsɔ wò legbawo katã kple wò ŋunyɔnuwo katã gblẽ kɔ ɖo na nye kɔkɔeƒe ta la, ne magbe wò gbagbã gudugudu, nye ŋku akpɔ nublanui na wò, eye makpɔ tawo fi!
Eye nye dɔmedzoe abi ade eseƒe ke, nye dziku nu afa ɖe wo ŋu, eye mafa dzi na ɖokuinye, ne wòadze sii be, nye Yehowa ye ƒo nu le nye ŋuʋaʋã me, nenye be, metrɔ nye dziku blibo la ƒo ɖe wo dzi.
Eye azu alɔmeɖenu kple vlodonu, nuxlɔ̃amenu kple ŋɔdzinu na dukɔ, siwo ƒo xlã wò godoo, nenye be, medrɔ̃ ʋɔnu wò le dɔmedzoe kple dziku me, eye mehe to na wò kple dziku; nye Yehowa ye gblɔe;
ne meda dɔwuame ƒe aŋutrɔ vɔ̃ɖiwo ɖe wo dome, ne woazu amewula, eye meda wo, be woagblẽ mi, eye meli kɔ dɔwuame ɖi na mi gleglegle, eye meŋe abolo ƒe ziɔɖeŋu na mi.