ती डाँडाहरूलाई परमप्रभुको वचन सुन्नू भन्, म सार्वभौम परमप्रभुले डाँडा-काँडा, खोँच र बेसीहरूलाई के भन्दै छु, त्यो सुन्न लगा। मानिसहरूले मूर्ति पुज्ने गरेका ठाउँहरू नाश पार्न म तरवार पठाउनेछु।
इस्राएलका सम्पूर्ण सहरहरू नाश हुनेछन् र तिनीहरूका पूजा-स्थलहरू, वेदीहरू र मूर्तिहरू चकनाचुर पारिनेछन्, धूप-वेदीहरू धूलोपीठो हुनेछन् र तिनीहरूले बनाएका सबै थोक लोप हुनेछन्।
तिनीहरू देशनिकाला भई त्यहाँ कैदमा रहनेछन्। त्यहाँ तिनीहरूले मलाई सम्झनेछन् र तिनीहरूलाई दण्ड दिने र बदनाम गराउने म नै हुँ भनी थाहा पाउनेछन् किनभने तिनीहरूका विश्वासघाती हृदयले मलाई त्यागे र तिनीहरूले मेरो सट्टामा मूर्तिहरू रुचाए। आफूले गरेका दुष्ट र पतन गराउने कामहरूले गर्दा तिनीहरूलाई आफैंसित पनि घृणा हुनेछ।
सार्वभौम परमप्रभुले भन्नुभयो, “तिमीहरूका हात-खुट्टा बजार! इस्राएलीहरूले गरेका दुष्ट र घिनलाग्दा कामहरूका कारणले गर्दा अफसोस गरेर रोओ। तिनीहरू लडाइँ, अनिकाल र रुढीमा मर्नेछन्।
लाशहरूचाहिँ मूर्तिहरूका बीचमा, वेदीहरूका चारैतिर, हरेक अग्ला डाँडाहरूमाथि, हरेक पहाडको टुप्पोमा, हरेक हरियो रूख र ठूलो फलाँटको रूखमुनि र तिनीहरूले आफ्ना मूर्तिहरूलाई बलि चढाएको हरेक स्थानमा छरपष्ट भई छरिनेछन्। तब म नै परमप्रभु हुँ भनी सबैले जान्नेछन्।
अँ, म आफ्नो हात उठाएर तिनीहरूको देश नाश गर्नेछु। म त्यस देशलाई दक्षिणको उजाड भूमिदेखि उत्तरको दिब्ला सहरसम्म ध्वस्त पार्नेछु र इस्राएलीहरूले बास गरेका कुनै ठाउँ बाँकी राख्नेछैनँ। तब म नै परमप्रभु हुँ भनी सबैले जान्नेछन्।”