Gua̱th diaal tin cieŋ yɛn thi̱n, bi wi̱i̱kun a day ti thil raan, kä bi gua̱th palikun da̱k. Kä bi yi̱knikun te ni lutdä. Kä bi kuth guäynikun töl, kä bi gua̱th tin la te cuuŋni wal tin kur thi̱n da̱k, kä bä lätkun diaal woc.
Kä nɛy tin bi kään kä yɛ ba ɣä tim rɛy dööri tin ba yɛ naŋ thi̱n ala pɛ̈ɛ̈c. Kä cikɛ lɔcdä jak kä jiäk kɛ ciaaŋ lo̱cnikiɛn kɛ ɣöö cikɛ rɔ̱ ri̱t kä ɣä kä guic wäŋkiɛn tin ni kuth guäynikiɛn. Kä bikɛ rɔ̱ lo̱k kɛ kui̱ jiäkni tin ci kɛn kɛ la̱t kɛnɛ kui̱ jiäkni diaal tin lökä.
Kä nɛy tin na̱n bikɛ li̱w kɛ juey. Kä bi nɛy tin thia̱k li̱w ko̱o̱r. Kä bi nɛy tin ci kään tin ŋot teekä li̱w kɛ buɔth. Kä bi ŋɛ̈ɛ̈nydä cu pɛn wi̱i̱diɛn inɔ.
Kä bikɛn ɛ ŋa̱c ɛn ɣöö ɛ ɣän Kuoth Nhial, mi wä nɛɛkiɛn tin ci li̱w te catdä rɛy kuthni guäynikiɛn, gëëkni yi̱knikiɛn kɛ gua̱th pali diaal, kɛ wuɔ̱th päämni tin ba̱r ba̱a̱r, kɛnɛ thär jiɛn tin tɔ̱ɔ̱c diaal kɛ ji̱th kuëli diaal kɛnɛ tin diaal tin la nööŋkɛ ŋuäny mi gɔaa kuth guäynikiɛn.
Kä bä tetdä ri̱c a jiäk kɛ kui̱diɛn, kä bä mundiɛn jak kä te ni lutdä gua̱thni diaal tin cakɛ kiɛth thi̱n ɛ cieŋkɛ thi̱n, ni däär dɔaar wä amäni Rib-laa. Bikɛ jɛ cu ŋa̱c ɛn ɣöö ɛ ɣän Kuäär ni Kuoth.”