Ta ka phene gia: Burdura katar o Israel, asunen o alav e Devleko: Gia phenda o Del o Gazda e burdonenge, e umalienge ta e paienge: Me ka cherav te avel pe tumende o jarni ta ka zatriv tumare thana vazdine.
Kaigo ka zivi, ka cherdon puste e forura, tumare altarura ka aven zatrime ta puste, ta tumare dela ka aven peradine ta zatrime, e eslike katar o kham ka aven zatrime, sogo cherden ka avel zatrime.
ta gola llene tumendar kai ka nasen, ka denpe golli mandar ande phuvia kai ka aven phangle, soke me phagilem pala lengo lio kai cherda o kurvaluko ta durile mandar ta pala lenge akha kai cherde o kurvaluko pala e dela. Ta ka avel lenge lallao pala o bilachipe kai cherde ande sa po gadope.
Gia phenda o Del o Gazda: Mar ande palme ta basal che porrne, ta phen: ¡Ioi, gachin gadope cherda o Israel! soke pala jarni, e bok ta o nasualipe ka meren.
Ta ka llanen kai me sem o Del, tumare llene mule ka aven maskar tumare dela, truial katar tumare thana e kurbanoke, pe suako than vazdino, pe suako than kai si upre pe burdura, telal katar suako kas baro ta zeleno ta telal katar suako ensina kai si la but krangura, kote kai phabarden o taimano sa tumare delenge.