1
Ha ojehuva’ekue pe áño 6-hápe, pe jasy 6-hápe ha pe ára 5-hápe che aguapy jave che rógape, ha Judaygua karai ancianokuéra oguapy joa che renondépe, Ñanderuete omoĩ ipo cheári.
2
Ha ama’ẽ, ha péina ápe ahecha peteĩ tekove ojoguáva peteĩ kuimba’épe, iku’a yvy gotýore hendy tatáicha, ha iku’va yvatéore, ku brónce omimbívaicha, (Ezequiel 1,26-27).
3
Ha pe tekove péva oipyso ipo, chejapyhy hag̃ua che akã raguégui; ha Ñanderuete Pytu Porãite chérupi yvate, yvy ha ára pa’ũme, chegueraha hag̃ua kepeguáicha Jerusalénpe, upe korapy rokẽ hyepy gotyoguápe oma’ẽva nórte gotýo, oĩháme ambue jára ra’ãnga omoñeko’õiva Ñanderuetépe.
4
Ha upépe oĩhína Israel Jára reko jajaipáva, ahecha haguéicha payetépe Babilónia ñúme, (Ezequiel 1,28).
5
Ha he’i chéve: Nde, kuimba’e ra’y, ejesaupi ko’ág̃a yvate gotýo. Ha ajesaupi rire yvate gotýo, péina ápe ahecha pe kuave’ẽmby renda rokẽ gotýo oĩha pe ta’ãnga oporomoñeko’õiva.
6
Ha upéi he’i chéve: Kuimba’e ra’y, nderehechái piko ko’ã mba’evaiete Israel retãygua ojapóva ko’ápe chemomombyry hag̃ua che rogaguasúgui. Ejeremive rehecha hag̃ua ambue mba’evaiete.
7
Ha chegueraha pe korapy rokẽme ha, ama’ẽvo, péina ahecha peteĩ kuára itápia rehe.
8
Ha he’i chéve: Kuimba’e ra’y, embotuicha ko’ág̃a pe tápia kuára. Ha ambotuicha rire ajohu peteĩ okẽ.
9
Ha Ha’e he’ive chéve: Eike rehecha hag̃ua umi mba’evaiete ojejapóva upépe.
10
Aike rire ahecha oĩha opaichagua mbói ha mymba ra’ãnga ikoty tápia rehe ha ambue jára gua’u ra’ãnga Israelguakuéra omomba’eguasuvahína.
11
Ha henondepekuéra oñembo’y umi (70) karai anciáno Israelguáva, ha Jaazanías, Safan ra’y, oĩ ijapytepekuéra, ha ipopekuéra oĩ peteĩ mba’yru ohapy hag̃ua mba’e ryakuã porãva ha umívagui opu’ã tatatĩ iñanambusúva.
12
Ha he’i chéve: Kuimba’e ra’y, rehecha piko mba’épa umi omyakãva Israélpe ojapo pytũmbýpe, ikotykuéra henyhẽ ta’ãngágui. Ha’ekuéra ningo he’i voi: Ñanderuete nañanderechái, Ñanderuete opoíma hetãgui.
13
Ha upéi he’i chéve: Ejeremi jevy rehecha hag̃ua ambue mba’e ivaietevéva ko’ã mba’égui.
14
Ha ha’e chereraha Ñanderuete róga rokẽme, opytáva nórte gotýo; ha upépe ahecha kuñakuéra oguapýva ha oguerojahe’óva Tamúzpe, Babiloniaygua járape.
15
Ha upéi he’i chéve: Rehecha porãmba piko kuimba’e ra’y. Ejereve rehecha hag̃ua ambue mba’e ivaietevéva ko’ãvagui.
16
Ha chegueraha Ñanderuete róga korapy hyepy gotyoguápe; ha péina Ñanderuete róga rokẽme oĩ 25 kuimba’e, Ñanderuete rogaguýpe ha pe kuave’ẽmby renda pa’ũme, ha ijatukupepekuéra oĩ Ñanderuete rogaguasu ha hovakuéra oma’ẽ kuarahyresẽha gotýo, ha omomba’eguasu hikuái pe kuarahy, oñesũvo hikuái kuarahy renondépe.
17
Ha he’i chéve: Rehecha porãmba piko, kuimba’e ra’y. Judayguakuéra noñemohyg̃uatãi ojapo hag̃ua ko’ápe ko’ã mba’evaiete, omyenyhẽmba hikuái ñaña rekógui Israel retãme chembopochyve hag̃ua; péina ápe imba’e ryakuã vai omoinge che tĩme,
18
upévare che pochy reheve añemoĩ hesekuéra, nambotymo’ãvéi che resa, naperdonamo’ãi ni ndaiporiahuverekomo’ãvéi ichupekuéra; osapukái hatãiterei ramojepe che apysápe, Che nahendumo’ãvéi isapukaikuéra.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015