Pa-weera loogr yʋʋmd a yoob soaba, a kiuug a yoob soaba, kiuuga daar a nu soaba, maam da zĩ m yiri t'a Zɩɩda nin-kẽembã ra zĩ m taoore. Beelẽ, Soaala-Wẽnd nuga waa vugr bala n tik maam.
M da getame la ade: bõn-vɩɩla sẽn wẽnd ninsaala, n lik-m. Sɛɛga tɛka n dabd tẽngrã ra yaa bugum; sɛɛga tɛka n dadb zugã ra yãnga ne vẽenem sẽn ya moomd yʋs.
Bũmb n tẽeg wa nugu n kolemd mam zoobdã. Wẽnd pãnga zẽk-m-la yĩngri la m yãeeme tɩ b tall-m lame n taas Zerizalɛɛm. B taas-m-la tẽnga pʋgẽ, nug goabg noora sẽnẽ. Zĩ-kãng la b ra yals wẽn-naand a ye togsende. Bõn-kãng yãeeb ra yĩida Naaba-Wẽnd sũuri.
B yeela maam: «Ezekiyɛl, zẽk f nini n ges nug goabga.» Tɩ mam zẽk m nin n ges nug goabga. Maan-kugr n da be nug goabga. Maan-kugra sẽn da be roog ninga noorẽ, b ra zaoolga Naaba-Wẽnd nif sẽn ka rat yãend a soabã.
Dẽ la b yeel maam: «Ninsaal biiga, f ne b sẽn maan la? A Israyɛl rooga maanda wɩɩbdo sẽn na yɩlẽ tɩ m zãag ne m ro-sõngã. Ad-f na le yãee wɩɩbd a taaba sẽn zem woto.»
Mam kẽe n gesame; da yaa gʋlb la b kar yã, n makd wiis buud fãa la rũms yoodo, n paas a Israyɛl sẽn waoogd wẽn-naands niynsa, bãmb n pid lalsã n karg n sege.
La neb pisopoe, Israyɛl roogã nin-kẽemse, n da yɛs wẽn-naandsa taoore. A Safã biiga a Yazaniya da yɛsa bãmb sʋka. Ned kam fãa ra zãada wisdu laag a nugẽ. Wisda yũuga ra zẽkdame.
M wʋma koe-kãnga: «Ninsaal biiga, fo nee Israyɛl rooga nin-kẽemb sẽn maand bũmb ning, likẽ wã, ned kam fãa a wẽn-naanda sẽn zaolgẽ la. Bãng tɩ yaa woto la b ra gomd ne taaba: ‹Soaala ka le rat n yãend-d ye, Soaala loog n basa d tẽngã.› »
La b talla maam n kẽ pʋgẽ sɩmannã. Mik ro-sõnga noorẽ, zãonga la maan-kugra sʋka, neb sẽn ta pisi la a nu n da be be; b zãnkudgã ra teesa ro-sõngã tɩ b nenga tees yaanga. B ra wõgemdame n waoogd wĩntoogã.
Tɩ Naaba-Wẽnd yeel maam: «F yãeeme-la, ninsaal biiga? Bãng tɩ wɩɩbda sẽn maand ka wã ka sek Zɩɩda tẽnga rãmb ye tɩ b na n pids-a ne pãn-tõogo n le sɩng m beegre la m sũur yikri.