M nọ hụn ikẹnnyẹ isin kẹ wẹ lala: wẹ gha ibẹka Ọnụ-mgbọn hụ rị mkpọnyin lala — Ọnụ-mgbọn hụ bu ihun zinmẹ ẹbamịn-ugu. Onyẹ-onyẹ imẹ wẹ bu ihiẹn o gi e gbu. Okẹnnyẹ ohu hụn yi ẹkwa-linẹni rị imẹ wẹ, o kẹn ihiẹn wẹ gi e de ihiẹn ukun. Wẹ ile nọ bịa d'e wuzo ẹhụ ukpo nchụn-ẹjan igwe-bronzu Ụlọ-nsọ.
Ya kẹ ọghọ Chuku Izrẹlụ nọ gha ebe o te rị elu chẹrobu ẹbụbụọ ahụn imẹ-imẹ Ụlọ-nsọ buli elu d'a nọdị ọnụ-mgbọn Ụlọ-nsọ. Osolobuẹ nọ hị okẹnnyẹ ahụn yi ẹkwa-linẹni, hụn bu ihiẹn wẹ gi e de ihiẹn ukun.
A nụ m kẹ Osolobuẹ sị ikẹnnyẹ ndị hụ họdụnị, “Sọnrinn'ẹ ghasọnmẹ obodoni ile kẹni ụnụ gbu. Gbu ni onyẹ ọwụlẹ o yelẹni ahịma ezimezi ihun. Elekwọlẹ ni wẹ ẹnya ihun; emẹlẹ ni omikẹn wẹ;
Ebe mmẹ sụọ rị nwan ogẹn wẹ gi rị imẹ obodo e gbu ndị wẹ rị e gbu, m nọ bu ẹfọ mama alị, kwanma, “Euu Osolobuẹ nwọn ihiẹn ile! I k'e gi ụdị oluluni sọn Jerusalẹm, tikpọchanrịn ndị Izrẹlụ ile họdụnị?”
Ọ nọ sị m, “Njọ ndị Izrẹlụ Ẹbamịn-ugu lẹ ndị Juda a karịgụọ ẹka ọda-ọda; ogbugbu-ogbugbu e jungụọ alịnị, eje-obibi e jun isi-alịnị wụ Jerusalẹm — makẹni wẹ rị a sị enwẹn wẹ, ‘Osolobuẹ a jụgụọ alịnị! Osolobuẹ arị a hụn ihiẹn rị e mẹni!’