Ak ogeero, kibwa bik lo kobunu oretab ormarichet ne bo meto, ne tokyingei murot ne bo katam, kotinyei chi age tugul karnennyi ne barisie; ak kiilaachi chito agenge eng’ ichek ngorietab katanit, kotinyei age tugul laletab wino eng’ suennyi. Ak kiba orit, ak kotononie ole negite kaptisisietab sugunwet.
Ak kitogosta lilindab Kamuktaindetab Israel eng’ ole mi kerubindet, ole kitebe, kwo ole bo tugatugikab got: ak kitwekyi chito ne kiilaachi ngorietab katanit, ne kitinyei laletab wino eng’ suennyi.
Ak kilenji Jehovah inendet, Ui bun kwenutab nganaset, kwenutab Jerusalem, ak ing’och turiosiekab togochikab bik che tigendos ak korirtos agobo tuguk tugul che kiwechei che kiyai eng’ kwenunnyi.
obar ogesu boiyo, muren, chepto, ak lagok che mengechen, ak kwonyik: ago amat orikyi chi age tugul ne kiging’och; ak otaune oldanyu ne tilil. Kitaune anyun boisiek che kimi taitab got.
Ak ye kita kobarisioti, ak kigang’etu eng’ yoto, abut kot kotiiny togennyu ng’ony, ak arir, ak amwa ale, Bwa Kiptaiyat Jehovah! Tos ibare bik tugul che king’et che bo Israel eng’ neregeguk che ng’wonen che rong’jingei Jerusalem?
Kolenja anyun, O kot tengektab gotab Israel ak ne bo Juda, kanyi emoni korotik, ak kanyi nganasani kamaaset ne bo kiruogutik: amu mwaei kole, Kigometo Jehovah emoni, ama keerei Jehovah.