Ando burs trito kana charoila o Joakim, charo katar o Juda, o charo Nabukodonosor katar e Babilonia avilo ando Jerusalem ta thoda truial katar o foro pe boñikonen.
Ta o Del mukla o charo Joakim te perel ande va katar o Nabukodonosor, ta gava charo te inllarel nesave ezgode katar o cher e Devleko ta anda len ande phuv katar o Sinar, kai o cher leke devleko, ta thoda gola ezgode ando cher kai guruven o barvalipe leke devleko.
Ta o charo Nabukodonosor phenda so te cherel e Aspenazke, o mai baro kai gazdarila pe leke eunukura. Phenda leke te inllarel nesave israelitonen kai sea katar e vicha mai glamni.
Saia te aven terne sukar ta te na aven nasuale, ta kai acharen suako bizaipe ta te llanen sar te radin ando cher e charoko. Galen o Aspenaz saia te sikavel len o pisipe ta e chib katar e kaldeura.
Ta te pravarenpe suako llive, o charo dia len te jan katar piro jape ta katar piri mol. Ta te sikaven len trin burs, ta pala gola trin burs te anen len angla o charo.
Ta gua kai gazdarila pe sa o cher e charoko pharruda lenge anava gia: O anav katar o Daniel thoda Beltsasar, o anav katar o Ananias thoda Sadrak, o anav katar o Misael thoda Mesak, a o anav katar o Azarias thoda Abednego.
A o Daniel ni kamla te meliavelpe e japea ta e moliaia e charoki, ta mangla katar o lleno kai gazdarila po cher e charoko te na thovel le pe zor te meliavelpe katar o jape e charoko.
ta phenda e Danieleke: Si mange dar katar mo gazda o charo, soke vou phenda so te jan ta so te pien. Ta mapalal te dikhela vou kai tumare muia si mai galbene neko e muia ogole ternenge ka dosaren man ta o charo ka chinel mo soro.
Gale stare ternen o Del dia len bizaipe ta te acharen suako lil ta suako sikadipe. Ta o Daniel acharela suako suno ta suako ezgoda kai sikadola sargo suno.
Ta o charo dia orba lenchar, ta maskar sa e terne ni malada ni iek te avel sargo o Daniel, o Ananias, o Misael ta o Azarias, ta von achile te radin e charoke.
Ta malada len des droma mai bizai pe sa ezgode katar o bizaipe ta o llanglipe neko sa e llene kai sea ande leki charoia kai cherena chirimata ta e llene kai dikhena e cheraia te apogodin so ka avelpe.