Ẹhụ a hụ e gbukepụ kẹ ọmụma krisolaịtị, ihun ẹ hụ e be kẹ amụma, ẹnya a hụ e nwun kẹ ukpẹ-ọwa, ụkụ lẹ ẹka a hụ e gbukepụ kẹ igwe-bronzu wẹ fichan ọhụnma-ọhụnma, olu ẹ hụ a han kẹ ebe igunrun ịhịan rị a zụn ụzụn.
Ọ sị, “Daniẹlụ, ịyụ hụn wụ okẹn ịhịan ẹnya Osolobuẹ. Lebankẹnmẹ oku m k'a gwa ị ẹnya. Lihi nwan ọtọ, makẹni wẹ zi m d'e kunrun i.” Ogẹn o gi gwa m ihiẹnni, m nọ lihi ọtọ — mmẹ lẹ ẹhụ rị a ma m nni.
Ya ọ nọ kumẹ, sị, “Atụlẹ egun, Daniẹlụ. Kete ụhụọhịn ahụn i bu obi che ihiẹnni n'ị ghọta, bu enwẹn i che alị ihun Chuku, Chuku a nụgụọ ihiẹn i ku, ya kẹ m bịanị nwan.
Kanị mmọn hụn rị a kị alị-eze Pẹshịa gbọnkin m ụzọ ọrọgbọ akpọhịn ohu-kwasị-ọgụn. Ya Maịkẹlụ, hụn wụ onyẹ ohu imẹ ndị-isi ndị mmọn-ozi nọ bịa d'e yeni m ẹka, makẹni mmọn rị a kị alị-eze Pẹshịa te gbọndọn m ebẹhụ.
Ya onyẹ nọ kẹ ịhịan nọ mẹtụ m ẹka ụgb'ọnụ. M nọ shịapụ ọnụ, oku nọ nị m ku. M nọ sị hụn wuzo m ihun, “Diọkpa, uhue ihiẹnni m hụn e d'e gbu m, akpụ ndụn ohu arịzị m.
Ọ nọ sị, “Atụlẹ egun, ịyụ hụn wụ okẹn-ịhịan ẹnya Osolobuẹ. Udọn ya rịn'ị! Ndụn ya ban ị; ndụn ya ban i.” Ogẹn o gi gwa m oku, ya ndụn nọ ban m. M nọ sị, “Di ọkpa kumẹ, makẹni y'e mẹọlẹ ndụn ban m.”
Ya ọ nọ sị m, “Y'a marịnghọ ihiẹn haịn m gi bịa d'e kunrun i? Eziẹ, m kinkọ nwan azụụn d'a lụsọn mmọn rị a kị Pẹshịa ọgụn, m rịzịkwọ a hụn mmọn a kị Grisi kẹ ọ rị a chọ n'ọ bịa.