E higa mar adek mar loch Kuros ruodh Persia, wach nofwenyore ni Daniel, ma bende niluongo ni Belteshazar. Kata obedo ni wachno ne en wach ma adier, to winjo tiende ne ok yot. Kata kamano ne onyise tiende e yor fweny.
Dende ne ng’ang’ni ka kidi ma nengone tek. Pat wang’e ne rieny mana ka mil polo, kendo wang’e ne liel ka mach. Bedene gi tiendene bende ne rieny ka mula moyue, kendo duonde ne wuo ka koko mar ji mang’eny.
Ne owachona niya, “Daniel in ng’at ma Nyasaye ohero ahinya. A malo mondo ichik iti iwinj gima adwaro wacho, nimar oseora iri.” Kane osewachona kamano, ne aa malo ka pod denda kirni.
To malaika ma jarit piny Persia ne okedo koda kuom ndalo piero ariyo gachiel. Eka Mikael ma achiel kuom malaike madongo nobiro mondo okonya, nikech ne adong’ kenda e piny Persia kuno.
Eka gimoro machalo gi dhano nomulo pien dhoga, mi achako wuoyo, ne awacho ni gima chalo dhano mane ochung’ e nyimano niya, “Jaduong’, fweny ma asenenoni ochwowo chunya, omiyo tekra orumo.
Nowachona niya, “Nyasaye oheri, omiyo kik chunyi parre kata kik iluor, to bed abeda gi chir.” Kane osewuoyo koda kamano, ne awinjo ka achako yudo teko moko, mi awachone niya, “Jaduong’ wachna gima idwaro nyisa nikech koro iseduogona teko.”
Asebiro mana ni mondo ahulni gima ondiki e kitap weche ma adiera. To koro onego adog mondo aked gi malaika ma jarit piny Persia. Bang’e malaika ma jarit piny Gris biro wuok, to onge ng’at manyalo konya mak mana Mikael ma malaika ma jarit piny Israel.