Ando burs trito katar o Siro charo katar e Persia, sikadila e alava e Danieleke Kai ikharena le Beltsasar. Ta e alava sea chache a niko nasti acharela len, a vou acharda e alava ta saia le bizaipe ande so dikhla sargo ando suno.
Leki esnaga saia sargo o berilo, ta leko mui dikhola sargo iek esterlicha, ta leke akha sea sargo plameko iagako, ta leke va ta leke porrne dikhona sargo tuch kai klichil a leko avazi asundola sargo but sueto.
Mapalal phenda mange: Daniel, kai o Del but volil tut, thov sama pe alava kai ka phenav chuke ta thov tut pe porrne, soke tute sem bichaldo akana. Kana phenela gaia orba mange, thodem man pe porrne ta izdrava.
Ondaka phenda mange: Daniel, na dara soke o purvo llive kai thodan tut te achare ta te avel tut liubao angla cho Del, sea asunde che alava ta cheres che alava me avilem.
A o gazda katar e charoina katar e Persia vazdinailo pe ma bis ta iek llive. A o Migel, kai si iek katar e mai bare gazda, avilo te pomozil man ta achilem kote e charonenchar katar e Persia.
A iek kai dikhola sargo chaurro manuseko, dodisarda me us. Ondaka putardem mo mui ta diem orba ta phendem e manuseke kai saia angla ma: Gazda, gava so dikhlem sargo ando suno cherda te dukhal man ta inai man zor.
ta phenda mange: Na dara, o Del volil tut e pas te avel tuia. ¡Cher chuke zor ta te ave tromano! Ta kana vou dela orba, lien pale zor ta phendem: De orba mo gazda soke dian man zor.
Ondaka phenda mange: ¿Llane soke avilem tute? Soke akana pale morabi te iriv man te marav man e gazdaia katar e Persia, ta kana ka gotoviu lea, o gazda katar e Gresia ka avel.