Ka n ni yɛn yɛl’ a shɛm pumpɔŋɔ ŋɔ nyɛla yɛlimaŋli.” Ka malaika maa daa yɛli ma, “Nanima ata na ni di Pɛriʒia nam, ka ŋun yɛn pah’ anahi ni ti doli bɛ nyaaŋa na, o mi ni ti nyɛla bundana n-gar’ o tab’ maa zaa. Ka o yi ti nya yiko o daazichi maa zuɣu, o ni bo soli n-chɛ ka sokam suhuri yiɣisi pah’ o zuɣu ka bɛ lu Giriisinim’ zuɣu.
Amaa o yiko pam maa puuni, o nam maa ni ti wurim m-pirigi ʒii bunahi. Ka nanim’ bɛn bi yi o zuliya ni na ni ti deeg’ o nam maa di n-zan’ o zaani, amaa ka bɛ lee ti ku mali yiko shɛli o ni daa mali maa tatabo.
Yuma biɛla nyaaŋa, Ijipti naa ni ti chaŋ Siria naa sani ni o min’ o ti laɣim niŋ naŋgbanyini, ka Ijipti naa ni ti zaŋ o bipuɣiŋga n-ti o paɣipini. Amaa bɛ naŋgbanyini biɛhigu maa ti ku yuui. Bɛ ni ti ku paɣ’ maa min’ o yidana ni o ba zaŋ tabil’ o yiŋ’ bi’ shɛb’ zaa bɛn daa dol’ o chaŋ.
Ka o ni ti kpuɣi bɛ wuna mini bɛ binnana ni neen’ shɛŋa bɛ ni zaŋ salima min’ anzinfa mali n-zaŋ ti bɛ wuna la n-lab’ kuli Ijipti. Ka yuma biɛla din ti nyɛ suhudoo saha puuni,
Amaa Siria naa ŋɔ bihi ni ti laɣim tɔbbihi pam lo tɔbu. Bɛ ni ti ʒi binshɛɣukam chaŋ kaman kokpɛɣu la n-tuhi tɔb’ maa hal ti paai bɛ dimnim’ sansan’ ni.
“Ka Siria naa maa ni lab’ kuli nti lan laɣim tɔbbihi bɛn galisi gar’ o tuuli tɔbbihi la. Ka saha ti paai ka o zaŋ tɔbbihi bɛn galisi pam ka mali bidibbina n-lan labina.
Di saha maa niriba pam ni ti taai duŋ niŋ Ijipti naa. Ka nyin’ Daniɛl zuliya ni ninvuɣ’ biɛ’ shɛb’ gba ni ti taai duŋ pahi ni di chɛ ka ʒii la ni yɛla la niŋ pali, amaa bɛ ni ti kɔŋ nasara.
Ka Siria naa ni ti zaŋ o tɔbbihi chaŋ ti teei gili tiŋ’ shɛli din goma mali kpiɔŋ. Ka Ijipti tɔbbihi ni ti kɔŋ tuhibu, hal bɛ ni tɔbutuhiri’ biinsi gba ti ku lan mali kpiɔŋ.
Ka Siria naa ŋun liri ba n-teei gili ba maa ni niŋ ba o suhu ni yu shɛm, ka bɛ ku tooi niŋ shɛli. O ni ti chaŋ ti zani Alikauli Tiŋgbɔŋ la ni n-deei li omaŋmaŋ’ yiko ni n-su zaa.
“Siria naa maa ni ti lan lo nia shɛli n-zaŋ o tɔbbihi zaa kana. Di saha maa o ni ti yɛn niŋ shɛm saɣim o dim’ maa nam sulinsi zuɣu, o ni ti yɛl’ o ni o chɛ ka o min’ o laɣim niŋ naŋgbanyini, ka ni ti zaŋ o bipuɣiŋga n-ti o dim’ maa paɣipini; amaa o nia maa ti ku nya nasara.
Dimbɔŋɔ nyaaŋa o ni ti chaŋ ti liri zuliya shɛb’ bɛn ʒi m-baɣi teeku la n-tuhi nyaŋ bɛ pam. Amaa tinshee sapashin’ so ni ti kana ti nyaŋ o n-chɛ ka o karimbaani maa zan’ tariga. Yɛlimaŋli, o shiri ni ti labis’ o karimbaani maa yɛl’ biɛri ʒil’ o.
“Ka na’ so ŋun yɛn zan’ o zaani ni ti zal’ o niriba farigu yɔbu din kpɛm’ pam, ka tim o farigudeera ni o ti deei li na ka o zaŋ gbib’ o nam maa ka di mali jilima. Amaa di ti ku yuui ka bɛ ku lala naa maa, pa suhuyiɣisili puuni bee tɔbu ni mi ka bɛ ti yɛn ku o.”
Malaika maa daa lan yɛli ma: “Siria na’ so ŋun ti yɛn dol’ o nyaaŋa ni ti nyɛla ninvuɣ’ biɛɣu ŋun ka soli ni o di nam maa, amaa o ni ti zaŋ yɔhiŋgu fa nam maa di n-libigi ba.
O ni ti chaŋ ti liri tiŋgban’ shɛli din mal’ azichi, ka ni ti tum tuun’ shɛŋa o yaannim’ ni so ni daa bi tum. O ni ti pirigi o ni ŋme tɔbu n-di neen’ shɛŋa mini binshɛŋa ti o nyaandoliba. O ni ti lo nia ni o liri sansana ŋ-ŋme ba tɔbu, amaa di ti ku lan yuui ka o saha naai.
“O ni ti lan niŋ suhukpeeni n-laɣim tɔbbihi pam chaŋ ti liri Ijipti naa, ka Ijipti naa maa gba ni ti zaŋ o tɔbbihi pam bɛn mali kpiɔŋ n-chɛ ka bɛ lu tab’ zuɣu. Amaa bɛ ni ti yɔhim Ijipti naa maa ka o ku di nasara.
Dimbɔŋɔ nyaaŋa nanima ayi maa ni ti laɣim ʒini n-di, amaa ka zaɣ’ biɛɣu tumbu tɛha din be bɛ suhuri ni zuɣu ni ti chɛ ka bɛ yɔhim taba. Ka bɛ ni bɔri shɛm mi ti ku niŋ, dama di saha na bi paai.
Ka Siria naa maa ni ti zaŋ o ni ŋme tɔb’ maa di neen’ shɛŋa n-lab’ kul’ o ya, ka ni ti lo nia ni o saɣim wuntizɔriba daadiini soli. O ni ti tum o suhu ni yu shɛm, ka naanyi lab’ o ya.
Romnim’ ni ti zaŋ bɛ sitimanim’ na nti lu o zuɣu ka dabiɛm gbaag’ o. Di saha maa o ni ti lab’ kuli ni suhuyiɣisili, ka lo nia ni o saɣim wuntizɔriba daadiini soli. O ti yɛn dolila ninvuɣ’ shɛb’ bɛn pun zaɣisi adiini soli maa saɣisigu.
O tɔbbihi ni shɛb’ ni ti kana ti daɣi Naawuni jɛmbu duu mini sansani. Ka o ni ti kari dabisili kam sara maligu la, ka zaŋ din nyɛ chihi’ biɛɣu din tahiri saɣiŋgu na zali di zaani.
Ka naa maa ni ti zaŋ yɔhiŋgu n-saɣim ninvuɣ’ shɛb’ bɛn pun zaɣisi adiini soli maa, amaa ninvuɣ’ shɛb’ bɛn doli Naawuni bɛn’ ni ti zani dɛde, ka chɛ ka bɛ min’ o tuhi.
Ka baŋdiba shɛb’ bɛn be bɛ ni ni ti wuhi bɛ ni niriba pam din tuhi. Amaa di ti ku yuui ka bɛ ku bɛ ni shɛba tɔbu ni, ka nyo shɛb’ buɣim ku ba, ka gbahi shɛb’ mi chaŋ ti leei daba.
Bɛ ni ti ku baŋdiba bɛn be bɛ ni ŋɔ ni shɛba, amaa ka di zuɣu chɛ ka niriba maa mali m-be kasi. Lala mi ka di yɛn be hal ti paai di tariga kaman Naawuni ni zali di saha shɛm.
“Siria naa maa ni ti tum o suhu ni yu shɛm. O ni ti duh’ omaŋa ka wuhi ni o gari wuni kam. O ni ti yɛli Naawuni ŋun gari wuna zaa ŋɔ yɛtɔɣ’ biɛri. O ni ti tooi niŋ lala hal ti paai saha shɛli Naawuni ni yɛn darig’ o tibili. Naawuni mi shiri ni niŋ kaman o ni lo shɛm.
Naa maa ni ti lihi ʒiɛm o yaannim’ wuna, ka lihi ʒiɛm paɣiba ni yuri wun’ shɛŋa gba. Hal o baɣa ti ku be wuni kam ni, dama o ni ti tɛhi ni ŋuna n-gari di zaa.
Amaa o ni ti ti wun’ so ŋun guli sansana la jilima. O ni ti zaŋ salima min’ anzinfa ni kuɣ’ viɛla binyara ni pin’ suma n-ti wun’ so ŋun nyɛ o yaannim’ ni daa bi jɛm.
O ni ti tuhi sansana din mali kpiɔŋ o yaannim’ ni daa bi jɛm wun’ so la sɔŋsim zuɣu. O ni ti ti ninvuɣ’ shɛb’ bɛn ʒe wuni ŋɔ nyaaŋa jilima, ka zaŋ ba zali zaashe’ kara ni, ka pirigi paliti ti ba ka di leei bɛ laara.
“Siria naa maa saha tariga yi ti miri, Ijipti naa ni ti chaŋ ti lir’ o, ka Siria naa maa ni ti zaŋ chɛchɛbunsi mini wɔribariba ni sitimanim’ pam tuh’ o ni o kpiɔŋ zaa. Siria naa maa ni ti ŋmanila kokpɛɣu n-chaŋ ti liri tin’ bɔbili.
Hal o ni ti chaŋ ti liri Alikauli Tiŋgbɔŋ la gba n-ku niriba tuhi pii nimaani. Amaa kulla tin’ shɛŋa din nyɛ Ɛdom mini Mɔab ni Ammɔn zuliya ni zuɣulaannim’ bɛn kpalim kɔŋko n-ni ti yi o nuu ni.