Ka ok uhulona tiend lekno, to uduto ibiro miyou kum machalre. Ang’eyo ni usewinjoru e kindu uwegi mondo uwuonda awuonda nyaka chop alok parona. Nyisauru lekno, to abiro ng’eyo ni kara unyalo hulo tiende adier.”
Eka ajuoke noduoke niya, “Yaye, ruoth onge kata ng’ato achiel e piny ngima manyalo nyisi gima idwaro ng’eyono. Onge ruoth moro amora, kata da bed ni oduong’ machal nadi, mosedwaro ni nyaka ajuoke hulne wach ma kamano.
Emomiyo Daniel nodhi ir Ariok mane ruoth oseketo mondo oneg jong’ad rieko mag Babulon, mi owachone niya, “Kik ineggi, to tera ir ruoth mondo alokne tiend lekne.”
to nitie Nyasaye e polo malo ma elo tiend midhierni. En ema osenyisi, in ruoth Nebukadnezar, gik ma biro timore e kinde mabiro. Koro mae fweny mane ineno e lek kinindo.
E sa mane irangee, kidi maduong’ nomukore kende e got moro, ka onge ng’ama omule, mi ogoyo tiend kido mane olos gi nyinyo kod lowono, mi oturo matindotindo.
Gi kanyono nyinyo gi lowo gi mula gi fedha kod dhahabu nokere okere mana ka mihudhi ma yamo tero e ndalo oro, maonge kata matin modong’. To kidi mane ogoyo kidono nolokore got maduong’ mopong’o piny ngima.
Ka isetho, to ruoth moro nobedie, ma lochne ok nobed maduong’ ka mari. Bang’ mano ruoth mar adek nobedie, ma nobed gi loch kuom piny duto. (En ema em gi nungo mar mula nyiso.)
Bende ne ineno ni tiend kidono gi lith tiendene ne olos gi nyinyo mokikore gi lowo. Mano nyiso ni nobed piny moting’o ogendini mopogore opogore. Kuonde moko ei pinyno nobed matek ka nyinyo, nikech tiend kidono nolos gi nyinyo, mokikore gi lowo.
To bende ne ineno ka nyinyo oruw gi lowo. Mano nyiso ni jotend pinyno notem kelo winjruok e kind jogi e yor kend, to gima gidwaro ok notimre, mana kaka nyinyo gi lowo ok nyal ruwore maber.
E kinde loch ruodhigo, Nyasach Polo nokel loch moro ma ok norum. Onge ng’ama noketh lojno, to en ema noketh loch mamoko duto, mi otiek chuth. En to nosik kogurore nyaka chieng’.
Ne ineno kaka kidi omukore kende ma onge ng’ama omule, kendo nineno kaka ne otuomo kido molos gi nyinyo gi mula gi lowo gi fedha kod dhahabu. Kamano Nyasaye Maduong’ nyisi gik mabiro timore e ndalo mabiro, kendo koro asenyisi ratiro gima nyocha ileko, bende asenyisi tiende.”
Kane ruoth Nebukadnezar owinjo wechego, nogoyo chonge piny mokulore nyaka e lowo e nyim Daniel, kendo ne ogolo chik mondo otimne misengni, kendo owang’ne ubani.
Nowacho ni Daniel niya, “Nyasachi e Nyasaye maduong’ie moloyo nyiseche mamoko duto, kendo en e Ruodh ruodhi. En ema oelo tiend midhierni. Ang’eyo kamano nikech osemiyi teko mar fwenyo tiend wachni.”