Ya kẹ ndị-nkịkwama ẹbụọ hụ họdụnị lẹ ndị-ọkịkị ile nọ chọma ihiẹn alị-eze hụn Daniẹlụ rụnlẹni ọhụnma, kanị ahụnnị wẹ ihiẹn wẹ e gi kpe ẹ, a hụnnị wẹ nkọrịanị. Ahụnnị wẹ eje-ihiẹn ọwụlẹ ẹka a, makẹni ọ wụ ịhịan esi, ahụnnị wẹ ebe ọ nọ la azụụn mọbụ rụn ọrụn a zizizi.
Mgbe Daniẹlụ gi nwan marịn nị e tigụọ wẹ iwu hụ, de ẹ, ma ọkwa a, ọ nọ lashi iwe ẹ. Mgbe ẹtọ imẹ ụhụọhịn ọ hụ e jẹn mmughẹ ẹ rị ibe elu hụn windo ẹ bu ihun zinmẹ ibẹka Jerusalẹm, e gbu osekpu, e mẹ ekpere, a kpanmịn Chuku ẹ, k'o dọn e mẹ mbụ.
Wẹ nọ buru eze d'a gwa a oku iwu ahụn o ti, sị, “Eze-Agụ, ẹlẹ i ti iwu, ma ọkwa a, nị onyẹ kpọku mmọn ọwụlẹ mọbụ onyẹ ọwụlẹ manị ịyụ wụ eze gha kikẹnni d'e ru ifọn ohu, wẹ tụ a ye imẹ olu ẹwọrọ?”
Ya wẹ nọ sị eze, “Eze-Agụ, Daniẹlụ, hụn wụ onyẹ ohu imẹ ndị wẹ gha Juda kpụnhan, ara gọn i ntịn; o dọnmẹzikwọnị nwan iwuni i ti detu. Echẹn k'o mẹ ekpere mgbe ẹtọ ụhụọhịn k'o dọn e mẹ.”
O ru ẹhụ olu hụ, ọ nọ gi uhue rị e huen'ẹ kpọcheni Daniẹlụ, sị, “Daniẹlụ-o, odibo Chuku ahụn rị ndụn, Chuku i, hụn y'e fe ogẹn ile a saghọ ẹka gbapụha ị ẹka ẹwọrọ?”
Ẹfọ nọ sụọ eze ụsụọ ọda-ọda, ọ nọ zi wẹ d'a dọpụha Daniẹlụ imẹ olu hụ. A dọpụha wẹ Daniẹlụ, wẹ nọ hụn a n'o nwọnni ebe ọ rụ ẹhụ, makẹni o gi Chuku ẹ dọn ẹnya.
“M rị e ti iwu nị ndị ile rị Ẹgbẹrẹ ọwụlẹ imẹ alị-eze m jẹnkọ d'a tụ egun Chuku Daniẹlụ, a gbaye ẹ. Makẹni ịya wụ Chuku hụn rị ndụn; o k'a rị jẹnrin ejẹn; etikpọkọ wẹ alị-eze ẹ; ọkịkị a agụkọ.