Kigigonyit anyun Daniel kosiir boisiechoto ak bounik, amu kitinyei tamirmiriet ne mie mising’; ak kiibwat laitoriat kole konde inendet koboi bororiet komugul.
Kicheng’ anyun boisiechoto koboto bounik kochaam Daniel agobo bounatet; ago ma imuch konyorji inendet ng’olyo anan ko lelut; amu ki bo iman inendet, ama kinyorji kiy ne ma litit anan ko lelut.
Kogong’alaljigei boisiek tugul che bo bounatet, kiptainik, ak bounik, bikab kapkiruok ak kiruogik, kole kogimit ng’atutiet ne bo kaplaitoriat, ak kong’at ng’atutiet ne kim, kole, age tugul ne somei kiy cheptalelit age tugul anan ko chi eng’ betusiek sosom, kobatenen, inye, ee laitoriat, kewirjin keringetab ng’etunyik.
Ak kingonai Daniel kole kagosir laitoriat kainet ko u noto, eng’ sirutichoto, kwo gonnyi; (ki yatotin tirisiok eng’ gonnyi, che tokyingei Jerusalem;) ak kogutuny konyil somok eng’ betut, ak kosa, komwachi kongoi Kamuktaindennyi, ko u ye kocham koyaei.
Kirik anyun bichoto, ak kong’alal eng’ taitab laitoriat agobo ng’atutietab laitoriat, kolenji, Tos kima isir kaineng’ung’ eng’ ng’atutiet ile, chi age tugul ne somei kiy cheptalelit age tugul anan ko chi eng’ betusiek sosom, kobatenen inye, ee laitoriandani, kewirjin keringetab ng’etunyik? Kowol laitoriat kole, Bo iman kiito, ko u ng’atutietab Medik ak Persik, ne ma walaksei.
Kiwol anyun bichoto eng’ taitab laitoriat kole, Maiitin Daniel-inoto ne bo lagokab bik che kigiluul che bo Juda, ee laitoriandani, anan koiit ng’atutiet ne kiisir kaineng’ung’, ago saei konyil somok eng’ betut.
Kiiyumgei anyun bichoto eng’ kayanjinet koyumjigei laitoriat, ak kolenji laitoriat, Ee laitoriandani, nai ile ng’atutietab Medik ak Persik ko magiwalei ng’atutiet anan etanutik che igimiti laitoriat.
Kong’at anyun laitoriat ng’atutiet, ak kigimut Daniel, ak kewirji keringetab ng’etunyik. King’alalji laitoriat Daniel kolenji, Sorun Kamuktaindeng’ung’ ne iote kotugul.
Ak kingorikta anyun keringet ole mi Daniel, kowaach laitoriat eng’ arogenet: king’alal laitoriat kolenji Daniel, Ee Daniel, otwogindetab Kamuktaindet ne sobei, tos imuchi Kamuktaindeng’ung’ ne iote kotugul kosorun eng’ ng’etunyik?
Koiyok Kamuktaindennyu malaikaiyandennyi koger kutuswekab ng’etunyik, ama ita kiy: amu ma kinyorja kiy ne ya eng’ tainnyi; ak kogeny, tom ayai kiy ne ya eng’ taing’ung’, ee laitoriandani.
Kibaibait anyun laitoriat mising’, ak kong’at kole kegonob Daniel eng’ keringet. Kigigonob anyun Daniel eng’ keringet, ama kinyor ole koam kiy eng’ bortanyi, amu kiimang’u Kamuktaindennyi.
Ang’ate ng’atutiet ale, Ingobotanso bik che mi bounatetab laitornatennyu ak koiyweis eng’ taitab Kamuktaindetab Daniel: amu inendet ko Kamuktaindet ne sobei, ak kotebyei koigeny, ak laitornatennyi ko maging’emei, ak kotebyei bounatennyi agoi kagesunet: