|
| 1 |
|
| Pek-sa-sat choh-ông tē-saⁿ nî, góa Tān-í-lí khòaⁿ-kìⁿ tē-it ê īⁿ-siōng liáu-āu, koh ū chi̍t ê īⁿ-siōng tùi góa chhut-hiān. |
|
| 2 |
|
| Góa khòaⁿ-kìⁿ ka-kī tī Í-lân -séng ê Su-san siâⁿ-pó, khiā tī O͘-lâi hô-piⁿ. |
|
| 3 |
|
| Góa gia̍h-thâu chi̍t-ē khòaⁿ, khòaⁿ-tio̍h chi̍t chiah mî-iûⁿ-káng khiā tī hô-piⁿ. I ū nn̄g ki tn̂g ê kak, kî-tiong chi̍t ki pí lēng-gōa chi̍t ki khah tn̂g; khah tn̂g hit-ki lō͘-bé chiah hoat--chhut-lâi. |
|
| 4 |
|
| Góa khòaⁿ-kìⁿ hit-chiah mî-iûⁿ-káng ǹg sai, ǹg pak, ǹg lâm teh tak; bô chi̍t chiah tōng-bu̍t tòng i ōe tiâu, bô chi̍t chiah ōe-tàng cháu-siám i ê ui-le̍k. I chiàu ka-kī ê ì-sù kiâⁿ-lâi-kiâⁿ-khì, iāu-bú-iông-ui. |
|
| 5 |
|
| Góa iáu-teh siūⁿ ê sî, koh khòaⁿ-kìⁿ chi̍t chiah soaⁿ-iûⁿ-káng tùi sai-pêng lâi, kiâⁿ-thàu choân-tōe, kha bô ta̍h-tio̍h thô͘. Chit-chiah soaⁿ-iûⁿ-káng tī i nn̄g lúi ba̍k-chiu ê tiong-kan ū chi̍t ki chin hiáⁿ-ba̍k ê kak. |
|
| 6 |
|
| I khì góa tú-chiah khòaⁿ--tio̍h, khiā tī hô-piⁿ, ū nn̄g ki kak ê mî-iûⁿ-káng hia, tùi i hoat siū-khì, tōa-la̍t chông--khì. |
|
| 7 |
|
| Góa khòaⁿ-kìⁿ i óa-kūn hit-chiah mî-iûⁿ-káng, khì-phut-phut kā tak, tak kah mî-iûⁿ-káng nn̄g ki kak lóng tn̄g--khì, bô-la̍t thang hoán-khòng. Soaⁿ-iûⁿ-káng kā mî-iûⁿ-káng lòng-tó tī thô͘-kha, koh ti̍t-ti̍t kā i thún-ta̍h, bô lâng ōe-tàng kā i kái-kiù. |
|
| 8 |
|
| Chit-chiah soaⁿ-iûⁿ-káng jú lâi jú chhàng-chhiu. Kàu i siōng ióng-chòng ê sî, i hit-ki tōa-ki kak tn̄g--khì. Tùi hit-ki kak goân-lâi ê só͘-chāi, ǹg thian-hā sì ê hong-hiòng hoat sì ki chin hiáⁿ-ba̍k ê kak. |
|
| 9 |
|
| Tùi hit tiong-kan ê chi̍t ki kak koh siⁿ chi̍t ki sòe-ki kak, ǹg lâm, ǹg tang, ǹg pûi koh súi ê tōe jú hoat jú tōa-ki, |
|
| 10 |
|
| tōa kah tú-tio̍h thiⁿ-téng bān-siōng, ōe-tàng chiong thiⁿ-téng bān-siōng kap chhiⁿ-sîn siak-lo̍h tōe-bīn, kā in thún-ta̍h. |
|
| 11 |
|
| I chū-ko chū-tāi, siūⁿ-kóng ka-kī ōe-tàng kap Thian-siōng ê Goân-sòe pí-phēng. I kìm-chí lâng ta̍k-ji̍t hiàn-chè hō͘ Thian-siōng ê Goân-sòe, koh húi-hoāi Goân-sòe ê sèng-só͘. |
|
| 12 |
|
| I kiông-pek sèng ê chú-bîn tī ta̍k-ji̍t hiàn-chè ê sū hoān-chōe; i koh chiong chin-lí hiat tī thô͘-kha. Chiah-ê sū, i lóng chòe-liáu chin sūn-lī. |
|
| 13 |
|
| Āu-lâi, góa thiaⁿ-kìⁿ chi̍t ê sèng-chiá teh kóng-ōe, koh ū lēng-gōa chi̍t ê sèng-chiá tùi thâu chi̍t ê sèng-chiá kóng, “Ta̍k-ji̍t tio̍h hiàn ê chè siū kìm-chí, hō͘ tōe hong-hòe ê chōe, sèng-só͘ kap chú-bîn siū thún-ta̍h, chiah-ê īⁿ-siōng tī-sî ōe si̍t-hiān?” |
|
| 14 |
|
| I kā góa kóng, “Koh nn̄g-chheng saⁿ-pah mî-ji̍t, sèng-só͘ chiū it-tēng ōe tit-tio̍h kiat-chēng.” |
|
| 15 |
|
| Góa Tān-í-lí khòaⁿ-kìⁿ chit-ê īⁿ-siōng, tú siūⁿ-beh chai hit-ê ì-sù ê sî, hut-jiân ū chi̍t ūi chhin-chhiūⁿ lâng ê khoán-sit--ê khiā tī góa ê bīn-chêng. |
|
| 16 |
|
| Góa koh thiaⁿ-kìⁿ O͘-lâi-hô hia ū lâng ê siaⁿ hoah kóng, “ Ka-pek-lia̍t, tio̍h hō͘ chit-ê lâng bêng-pe̍k chit-ê īⁿ-siōng.” |
|
| 17 |
|
| I chiū lâi góa khiā ê só͘-chāi. I chi̍t-ē kàu, góa chin khióng-hông, bīn phak tī thô͘-kha. I kā góa kóng, “Lâng ah, lí tio̍h liáu-kái, chit-ê īⁿ-siōng ū koan-hē le̍k-sú ê chiong-kio̍k.” |
|
| 18 |
|
| I tùi góa kóng-ōe ê sî, góa hūn--tó, bīn ǹg thô͘-kha. I kā góa bong, kā góa hû--khí-lâi. |
|
| 19 |
|
| I kóng, “Góa kā lí chí-sī Siōng-tè thêng-chí hoat tōa siū-khì ê sî ōe hoat-seng ê tāi-chì; che kap Siōng-tè só͘ chí-tēng le̍k-sú ê chiong-kio̍k ê sî-kan iú-koan. |
|
| 20 |
|
| “Lí khòaⁿ--tio̍h hit-chiah ū nn̄g ki kak ê mî-iûⁿ-káng sī chí Bí-tí-a -ông kap Pho-su hông-tè. |
|
| 21 |
|
| Hit-chiah soaⁿ-iûⁿ-káng chiū-sī Hi-la̍h -ông; nn̄g lúi ba̍k-chiu tiong-kan ê tōa-ki kak chiū-sī Hi-la̍h tē-it ê ông. |
|
| 22 |
|
| Koan-hē tōa-ki kak tn̄g--khì, koh tùi kak ê ē-bīn hoat sì ki kak chhut--lâi, chiū-sī ū sì ê kok beh tùi hit-ê kok siⁿ--chhut-lâi, m̄-kú sè-le̍k lóng put-pí hit-ê kok. |
|
| 23 |
|
| “Chit sì ê kok kàu boa̍t-kî chōe-ok koàn-boán ê sî, it-tēng ōe ū chi̍t ê ông heng-khí; i bīn-māu hiong-ok, khúi-kè-to-toan. |
|
| 24 |
|
| I ê koân-pèng hui-siông tōa, m̄-kú m̄-sī in-ūi i ka-kī ê châi-tiāu. I ōe chō-sêng hui-siông tōa ê húi-bia̍t, ōe-tàng chiàu ka-kī ê ì-sù sūn-lī chìn-hêng; koh ōe húi-bia̍t ū koân-le̍k ê lâng kap sèng ê chú-bîn. |
|
| 25 |
|
| I chin kan-chà, gâu ēng khúi-kè hō͘ i beh chòe ê sū sūn-lī chìn-hêng. I chū-ko chū-tāi, ōe thàn lâng bô hông-pī ê sî hāi-sí chin chōe lâng, koh beh khí-lâi te̍k-tùi bān-ông ê Ông, m̄-kú i ōe hō͘ chhiau-kè lâng lêng-le̍k ê khùi-la̍t kā i siau-bia̍t. |
|
| 26 |
|
| Í-siōng só͘ kóng nn̄g-chheng saⁿ-pah mî-ji̍t ê īⁿ-siōng lóng ōe hoat-seng, m̄-kú lí tio̍h pó-siú chit-ê pì-bi̍t, in-ūi che koan-hē chiong-lâi chin kú ê sū.” |
|
| 27 |
|
| In-ūi án-ni góa Tān-í-lí hui-siông ià-siān, phòa-pīⁿ kúi-nā ji̍t, āu-lâi chiah khí-lâi pān-lí ông kau-tài ê chèng-sū. Góa in-ūi chit-ê īⁿ-siōng kiaⁿ-hiâⁿ khùn-jiáu, in-ūi bōe liáu-kái īⁿ-siōng ê ì-sù. |
|
|
|
|