Ando burs trito katar e charoina katar o Belsasar, me o Daniel sikadila mange aver ezgoda sargo ando suno mapalal katar o goia ezgoda kai sikadilaia mange sargo ando suno.
Vazdiem me akha ta dikhlem iek bakro purano kai saia angla e len, ta saia le dui singa. Ta i kana leke singa sea bare, iek lendar saia mai baro neko o gua, ta o mai baro barilo mapalal.
Dikhlem kai o bakro purano pe singenchar ranila karing perel o kham, karing o norte ta karing o sur. Ta kai nisavi zivirinia nasti achela angla le, ta niko nasti nasela katar leki zor ta cherela so mangela ta bariola.
Kana me dikhava gala ezgode, iek busno avela katar perel o kham upral katar sa e phuv bi te dodil e phuv, ta gua busno saia le iek sing bari maskar leke akha.
Ta phagla leke dui singa kana avilo pasa lete, soke gua busno ni saia le zor te ustel angla le, ta perada le ta ustada le, ta ni saia niko te kurtulil le katar gua busno ta katar leki zor.
Ta gua busno but barilo, ta kana saia le mai but zor goia sing phagle la, ta pe leko than likiste aver star singa bare karing e star riga katar e baliava e milosoke.
Ta i vazdinailo llik po birovi katar e boñikura ta cheres lete saia ikando o kurbano kai delpe suako drom e ofrenda suako lliveseki ta o than katar o santuario saia chudino pe phuv.
Ta cheres o bilachipe saia leke dino e boñikura ta i lenchar o kurbano kai delpe suako drom, ta chudia pe phuv o chachipe ta cherda so vou mangla ta llala leke sukar.
Ondaka asundem kai iek santo dela orba ta aver katar e santura phenda goleke kai dela orba: ¿Kana ka gotovil gava sargo suno katar o kurbano kai delpe suako drom? ta ¿Pe gachin ka avel ios o baro bilachipe te mukelpe o santuario ta e boñikura te aven ustadine?
Ondaka kana avilo pasa ma, chudisailem ta diem changa lligo mo chikat dodisarda e phuv. A vou phenda mange: Achar, chaurro manuseko, soke gava sargo suno si e vremeke katar o son.
Ta kana ka avel o son katar lengo gazdaripe, ta kana lengo bilachipe ka avel mai baro, ka vazdiniaol iek charo kai pe leko mui ka achardol o baripe, ta ka acharel e ezgode gurudine.
Ta ka avel but zuralo, a na pe zoriaia, ta ka cherel bare zatranie. Gia sukar ka llal leke kai ka zatril manusen kai si but zurale ta i bute llenen katar o foro santo.
Pe bizaimaia ka cherel te bariol o kojaipe ande leko va, leko lio ka pherdol baripe, ta but llene kai zivina esmiro ka zatrin len kojaimaia, ta ka vazdiniaol po gazda katar e gazda, a ka avel phago a na katar o va e manuseko.
Ta me o Daniel achilem phago ta nasualo nesave llivesa. Ta kana ustilem radisardem pe ezgode e charoke, ta but darano achilem cheres so dikhlem sargo ando suno, soke ni achara.