Isirayɛlidenw tun be i ko yiri ɲanaman min be deen kɛ kosɔbɛ. U deenw mana caya, u b'u ka batolikɛyɔrɔw caya. U ka dugukolo mana nafa di, u b'u ka jokabakuruw masiri.
Samarikaw be yɛrɛyɛrɛ misiden jaa kosɔn, min be Bɛtavɛni. A sɔnbagaw be dusukasi la a kosɔn, murutigiw be kasir'a kosɔn. Bari boɲa min tun b'a kan, o bɔra.
U bena taga n'a ye Asiri jamana na, ka masacɛba boɲa n'a ye. O maloya be kɛ Efarayimu kɔmɔgɔw ta ye. Isirayɛli mara mɔgɔw ye ŋaniya minw ta, u bena maloya olu kosɔn.
Isirayɛlidenw ye hakɛ kɛ Bɛtavɛni sɔnnikɛyɔrɔ minw na, olu bena halaki. Ŋɔni, ni biin le bena fa u ka josɔnyɔrɔw la. U bena n'a fɔ kuluw ye ko: «Aw k'an datugu!» K'a fɔ tintinw ye ko: «Aw ka ben an kan!»
Efarayimu kɔmɔgɔw ye sɛnɛkɛmisi ɲanaman ye, min be sɔn ka suman gosi. Ayiwa, ne bena lɔgɔ la u kaan cɛɲuman kan. Zuda kɔmɔgɔw bena foro bugubugu, Yakuba deenw bena siɲɛni kɛ.
O la, aw ka tilenninya sira taama, aw bena ɲumanya sɔrɔ. Aw k'aw sɔɔnw yɛlɛma. Ne Masaba ɲinituma le ye sisan ye fɔɔ ka taga se ne nawaati ma, k'aw kɛ mɔgɔtilenninw ye.
O la, kɛlɛ mankan bena wili aw ka mɔgɔw cɛma, fɔɔ aw ka dugu barikamanw bɛɛ bena halaki i ko Salamani ye Bɛtaribɛli halaki cogo min na kɛlɛ loon na, u ye baa ni deenw nɔɔni ɲɔgɔn kan tuma min na.