Izrɛl tan lɛk tik we de gro na gud grɔn - na so i frɛsh ɛn de bia bɔku frut. Bɔt as dɛn de bɔku, na so dɛn de bil mɔ ples fɔ wɔship Beal; as tin de bɛtɛ na di kɔntri, na so dɛn de kɔmɔt biɛn PAPA GƆD.
Na ɛmti tɔk dɛn de tɔk; dɛn de swɛ fɔ natin se dɛn de mek wanwɔd; so jɔjmɛnt go bɔs pan dɛn lɛk gras we gɛt pɔyzin na di rod dɛn we divayd plant na fam..
Di pipul na Sameria go fred we dɛn si di kaw-pikin dɛn we dɛn mek na Bɛthavɛn. Di pipul go fil am lɛk se dɛn gɛt bɛrin ɛn dɛn man dɛn we de mek sakrifays to Beal sɛf go fil am we PAPA GƆD dɔn pul di tin we dɛn de blɔf fɔ kɔmɔt to dɛn.
Di ples dɛn na Avɛn we dɛn mek fɔ wɔship dɛn ɔda gɔd dɛn go pwɛl, soso chuk chuk nain go de pan dɛn, dɔn da tɛm de dɛn go ala se mek di mawnten dɛn kɔba dɛn ɛn di il dɛn fɔdɔm pan dɛn.
Ifrem na lɛk yɔŋ uman kaw we lɛk fɔ de mas mas tin dɛn bɔt a nɔ gri fɔ tay in nɛk to in kɔmpin fɔ wok; bɔt naw, Ifrem gɛt fɔ wok wit in kɔmpin so dɛn go mek Juda jɔyn am fɔ wok. Jekɔb go gɛt fɔ wok insɛf.
So udat plant sid we raychɔs go gɛt lɔv we nɔ de chenj fɔ in avɛst; tɛm dɔn rich we ɔlman fɔ tray no ɛn du wetin PAPA GƆD want dɔn i go mek bɛtɛ fala ɔlman.
We dɛn dɔn plant di sid dɛn wit sin, na soso kɔrɔpshɔn ɛn lay go bi dɛn frut we go bia. As na dɛn sojaman dɛn ɛn di tin dɛn we dɛn gɛt fɔ fɛt wit, dɛn abop pan,
na soso fɛt fɛt dɛn go de pan, ɔl di tin dɛn we dɛn mek fɔ fɛt wit go pwɛl lɛk aw kiŋ Shalman bin pwɛl Bɛthabɛl we dɛn go fɛt; dɛn bin ivin kil mami ɛn pikin da tɛm de.