Ifriimnim’ daa yi tɔɣisi yɛtɔɣa, niriba niŋgbuna sɔhirimi, bɛ daa tibigi ba pam Izraɛl tiŋgbɔŋ ni. Amaa ka bɛ daa ti jɛmdi Baal, ka di zuɣu chɛ ka bɛ tum alahichi ka kpi.
Ka pumpɔŋɔ bɛ na kul tumdila alahichi pahira. Bɛ zaŋ kuriti mali binnana, ka baŋsimnim’ dooi anzinfa mali buɣa, ka di zaa nyɛ machɛl’ ni mali shɛli, ka bɛ yɛri niriba, “Malimiya buɣa ŋɔ.” Ka ninsalinim’ jɛmdi naɣibihi.
Dinzuɣu bɛ ni ti ŋmanila asiba paɣili bee maligim din kpahi lu bi to la bee bɛ ni yɛli kabɔɣili ni wurigu shɛli bahi la bee nyɔhi din yiri takɔro ni la.
Kaman bɛ ni gbahi jɛŋgbini bihi ka o suhu yiɣisi shɛm la, lala ka n suhu ni yiɣisi bahi bɛ zuɣu. N ni dari tɔhi ba, ka ŋub’ ba kaman gbuɣinli la, kaman mɔɣu ni biŋkɔbiri ŋ-ŋub’ ba la.
N tiligim’ ba kpiimba biɛhigu shee chandi? N tiligim’ ba kum ni? Nyin’ kum, a daalɔbɔnim’ la lee be ya? Nyin’ kpiimba biɛhigu shee, a bahiyol’ la lee be ya? N nini bi lan zɔri nambɔɣu.
Hal bɛ yi ti zoori kaman momaha la, Yawɛ pɔhim ni yi wulimpuhili polo mɔɣu ni na nti ʒe nyuui bɛ kɔbilnina, ka bɛ kɔzɔrima nyuui. Ka di ʒe bɛ tiŋgbani maa ni daazichi zaa chaŋ.
Samarianim’ ni ti ʒi bɛ tuumbiɛri zambu, dama bɛ zaɣisi bɛ Naawuni. Bɛ ni ti zaŋ takɔbi ku ba, ka zaŋ bɛ biliɛri fiɛbi tiŋ’ chɛrisichɛrisi, ka karigi bɛ paɣipuhinim’ puya.