×

Ika Bible 2018

Hosia 14

1
Rogharị nị nwan, ndị Izrẹlụ, kweyeni Osolobuẹ wụ Chuku ụnụ makẹni ụnụ a kpọgburugụọ njọ dan.
2
Gi ni arịrịọ jẹn d'e kunrun Osolobuẹ, sị n'a: “Dodo, gbagharị ẹnyi njọ ẹnyi, y'a nabanhan arịrịọ ẹnyi. Ẹnyi k'e gi ọnụ ẹnyi ye i oyiye, oyiye ọjịja-mma.
3
Ndị Asiria azụọpụhakọ ẹnyi; ẹnyi e gikọ ẹshin-agha dọn ẹnya. Ẹnyi akpọkọzị mmọn ẹka ẹnyi kpụ ‘Chuku ẹnyi’. Euu Osolobuẹ, ẹka ị kẹ ndị nwọnlẹni nẹdi lẹ nnẹ nọ a hụn omikẹn!”
4
Osolobuẹ sị, “M k'a gwọ wẹ ọdanpụnị wẹ danpụ; m k'a shịapụ ẹfọ nwọn ihiẹn-ọsụsụọ wẹ makẹni olulu m rị e buni wẹ a rọgụọ.
5
M k'a rị kẹ igirigi ebe ndị Izrẹlụ rị, e sue wẹ, e gbuke kẹ obobo; wẹ k'a gba mkpọgụn kẹ osisi rị ẹgboko alị Lẹbanọnụ.
6
Wẹ k'a wasọnmẹ agala ụzọ ile, ma mma kẹ osisi olivu, e kun fuẹin rịkẹ ẹgboko Lẹbanọnụ.
7
Wẹ k'e kinhẹn, birizi igungun m; wẹ k'a barahị kẹ ọka, a la ẹnya kẹ osisi vaịnị gbe iwowo o gi a mị mkpụrụ; wẹ k'a nụ otiti wẹ rịkẹ manya Lẹbanọnụ.
8
“Ụnụ ndị Ifrem Izrẹlụ Ẹbamịn ugu, kị ụnụ gidẹ mmọn e mẹ? Mmẹ wụ onyẹ hụn a za ụnụ ekpere, e lepụ ụnụ ẹnya — ẹlẹ mmọn ndị ahụn. M rịhụ kẹ saịprẹsị ghalẹni a gbụ ẹkụkwọ, mmẹ kẹ wẹ gha a mị mkpụrụ.”
9
Ndị marịn ihiẹn wẹ ghọta ihiẹn ndịnị; ndị nwọn nghọta wẹ marịn ihiẹn wẹ wụ. Makẹni ụzọ Osolobuẹ furu efuru, ndị kụrụ ọtọ a gha wẹ, kanị ndị e mẹfieni a kpọgburu, a dan.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes