É ɖo mɔ̌ có Izlayɛ́li ví lɛ́ɛ ná sukpɔ́ káká bó ná cí xuta nyɛ́kɛ́n ɖɔhun; è nɔ sixú jlɛ́ xuta nyɛ́kɛ́n ǎ, è ka nɔ sixú xa ǎ. Énɛ́ ɔ́, Mawu sɔ́ ná ɖɔ nú yě ɖɔ yě kún sɔ́ nyí togun émítɔn ó ǎ, é nyɔ́ wa ɔ́, é ná ɖɔ nú yě ɖɔ yě nyǐ Mawu gbɛɖe ɔ́ sín vǐ.
Mawu Mavɔmavɔ ɖɔ: “Mi dó hwɛ Izlayɛ́li nɔ mitɔn ɔ́, mi dó hwɛ ɛ, ɖó é sɔ́ nyí asi ce ǎ, nyɛ lɔ ka sɔ́ nyí asú tɔn ǎ. É ní ɖe aga wuntun e ɖo nukún tɔn mɛ ɔ́ síin, bó ɖe aga wuntun e ɖo anɔ̌ tɔn jí ɔ́ síin.
É má nyí mɔ̌ ǎ ɔ́, un ná ɖe e nyi mɛ̌, un ná ɖe e nyi mɛ̌ jɔgbe. Un ná sɔ́ ɛ dó húzú gbětótló, un ná sɔ́ ɛ dó húzú axéko, un ná ɖó sinnugblá n'i káká, bɔ é ná wɛ́n vɛ̌.
Nɔ yětɔn lɛ aga, mɛ e hɛn xo yětɔn ɔ́ kɔ́n wi éɖée tɔn, ɖó é ɖɔ: ‘Un ná yi ba xɔnnɔ ce lɛ́ɛ mɔ. Đó yě wɛ nɔ́ ná mì nǔɖuɖu kpó sin kpó, gbɔ̌fúnvɔ kpó akwɛ́núvɔ kpó, ami kpó ahan kpó.’ ”
É ná kán wezun jɛ xɔnnɔ tɔn lɛ́ɛ gúdo, é ká ná xwedó yě wú ǎ. É ná ba yě, é ká ná mɔ yě ǎ. Énɛ́ ɔ́ gúdo ɔ́, é ná ɖɔ: “Un ná lɛ́ kɔ yi asú ce xóxó ɔ́ gɔ́n, ɖó hwenu e un ɖo gɔ̌n tɔn ɔ́, nǔ nyɔ́ nú mì hú lě e un ɖe gbɔn égbé din é.”
Énɛ́ ɔ́ wú wɛ un ná yí jinukún ce sín así tɔn ɖo nǔkún-yiya hwenu, bó ná yí vɛ̌ɛn ce sín así tɔn vǐwun gbigbɛ hwenu. Un ná ɖe gbɔ̌fúnvɔ ce kpó akwɛ́núvɔ ce kpó sín wǔ tɔn; gbɔ̌fúnvɔ kpó akwɛ́núvɔ kpó e é dó hwlá mɛ̌ é.
Un ná ɖó awǎ e jɛ wɛ é ɖe ɔ́ bǐ te. Xwe e ɖu wɛ é ɖe lɛ́ɛ, sunwájǐxwe e ɖu wɛ é ɖe lɛ́ɛ, gbɔjɛzán e ɖu wɛ é ɖe lɛ́ɛ, kpódó agɔ̌ e ɖu wɛ é ɖe lɛ́ɛ bǐ kpó ɔ́, un ná ɖó bǐ te.
Un ná sú vǐwungbo tɔn lɛ́ɛ kpó fígitín tɔn lɛ́ɛ kpó kún dó; énɛ́ lɛ́ɛ wɛ nyí nǔ e xɔnnɔ tɔn lɛ́ɛ ná ɛ é, bɔ é nɔ́ ɖɔ: “Nǔ e xɔnnɔ ce lɛ́ɛ ná mì lɛ́ɛ nɛ́. Un ná sɔ́ nǔ énɛ́ lɛ́ɛ dó húzú zunkan, bɔ gběkanlin lɛ́ɛ ná nɔ́ wá ɖu nǔ ɖo fínɛ́.
Un ná dɔn tó n'i nú azǎn nabí e é dó zǎlínkpɔ́n zo nú vodún Baalu lɛ́ɛ xɔ é; un ná dɔn tó n'i nú azǎn nabí e é dó alɔkɛ́ kpó kɔjɛ́ kpó dó ba acɔ́ ná xɔ é, azǎn nabí e é ba acɔ́ ná bó yi ba xɔnnɔ tɔn lɛ́ɛ mɔ, bó wɔn mì xɔ é.
Un ná sɔ́ vǐwungbo tɔn lɛ́ɛ kpó adǎngbomɛ tɔdo ɔ́ kpó jó n'i ɖo fínɛ́, bɔ é ná nyí nukúnɖíɖó sín hɔn ɖé bó hun n'i. É ná jɛ han ji jí sín fínɛ́, lě e é kó nɔ́ ji gbɔn ɖo ɖyɔ̌vǐ mɛ é, lě e é kó nɔ́ ji gbɔn hwenu e é gosín Ejípu é.”
Gbe énɛ́ ɔ́ gbe ɔ́, un ná bló bɔ yě ná jɛ akɔ xá gběkanlin lɛ́ɛ, kpó xɛ lɛ́ɛ kpó, kpódó kanlin e nɔ sá gbɔn kɔ́ mɛ lɛ́ɛ kpó. Un ná bɛ́ gǎ kpó hwǐ kpó, kpódó ahwanfunnú bǐ kpó sín to ɔ́ mɛ, bó ná bló bɔ togun ce ná dɔ́ amlɔ bo vo.
Un ná da we bɔ a nǎ nyí asi ce káká sɔ́yi. Agban e un ná ná nú we ɔ́ ɖíe: un ná wa nǔ ɖó sɛ́nxwi jí nú we, un ná wa nǔ ɖó hwɛjijɔ jí nú we, un ná yí wǎn nú we, un ná ɖó xomɛfífá dó wǔtu towe.
Gbe énɛ́ ɔ́ gbe ɔ́, mi ná mɔ ɖɔ nyɛ Mawu Mavɔmavɔ nɔ́ yí ɖɛ. Un ná ná nǔ e ba wɛ jǐxwé ɖe lɛ́ɛ jǐxwé, bɔ jǐxwé ná ná nǔ e ba wɛ ayǐkúngban ɖe lɛ́ɛ ayǐkúngban.
Un ná ɖó tɛnmɛ nú Izleyɛ́li ɖo to ɔ́ mɛ, bó ná yí wǎn nú WǍNGBƐ́. Un ná ɖɔ nú MI SƆ́ NYÍ CE Ǎ ɖɔ: ‘Togun ce wɛ a nyǐ’, bɔ é ná ɖɔ nú mì ɖɔ: ‘Mawu ce wɛ a nyǐ.’ ”