Nnẹ wẹ a gbaọlẹ ịgbaraja; nnẹ mụnị wẹ e mẹọlẹ ihiẹn ifẹnrẹn — o gi sị enwẹn ẹ, ‘M k'a gbasọnmẹ ndị mmẹ lẹ wẹ rị a sụọ, uwẹ e ye m ihiẹn m'e ri lẹ mirin m'a ra lẹ oruru lẹ ẹṅẹnrẹn-anụ m gi a kpa ẹwuru; uwẹ e ye m ofigbọn lẹ udẹn, e ye m manya m'a ra.
O k'a gbasọn ndị ya lẹ wẹ rị a sụọ, kanị o kunrunkọ wẹ; ọ k'a chọ wẹ, kanị ọ hụnkọ wẹ; ẹnya e fọn ẹ, ọ sị, ‘M k'a laburu di m ibuzọ m — nị ogẹn ahụn mmẹ lẹ ịya kẹ ihiẹn ka mma.’
Ufiri ẹ, ogẹn ọka ru, a napụ m wẹ ọka m; ogẹn manya-ọhụn ru, a napụ m wẹ manya ọhụn m — a napụzị m wẹ ẹṅẹnrẹn atụnrụn lẹ oruru m hụn m ye wẹ gi kparị ẹkwa kpumẹ ọtọ wẹ.
M k'e wiwipụ vaịnị lẹ figi wẹ kụn, hụn wẹ rị a sị nị ya kẹ ndị wẹ gbasọn gi kụ wẹ ụgwọ. M k'e gi alị vaịnị lẹ figi ndị ahụn ile họnrin ẹgboko, anụ-ọfịa e bu wẹ ile ri.
M k'e ye ẹ afụnfụn ọrọgbọ ile hụ o gi mụnị Baalụ ichẹn-ichẹn nsẹnsi; o gi rị e yi ihiẹn-ntịn a lẹ ihiẹn-mma a, a gbasọn ndị ya lẹ wẹ rị a sụọ — zọ mmẹ nwẹn. Osolobuẹ e kụgụọ a.
A nọ m ebẹhụ sị a d'e werizi alị-vaịnị a; e mẹ m Ọdanmgbugbu Nsọngbu họnrin ọnụmụzọ ihiẹn rị mma. Ọ nọ ebẹhụ mẹzi k'o mẹ mbụ, ogẹn o gi rị nwagbọọ ogẹn o gi gha alị Ijiptu pụha.
“M k'e tini anụ-ọfịa lẹ nnụnụ iwu tini ihiẹn ndị a rịnị iwu, makẹ wẹ gha a rụ wẹ ẹhụ. M k'e wepụ ụta lẹ ọpịa-agha alịnị ịhịan ile e biri udọn-lẹ-ndọnkwa.
“M k'a kụnye Izrẹlụ alịnị kẹ ihiẹn m, e mẹni m ‘Omikẹn-arịa’ omikẹn ọsụọn'a nị m kpọ a ‘Omikẹn-arịa’; m k'a sị ndị nwẹn w'a kpọ ‘Ẹlẹ wẹ ndị nke m,’ ‘ndị nke m kẹ ụnụ wụ,’ a sị wẹ m, ‘Ịyụ wụ Chuku ẹnyi.’ ”