Ruoth Nyasaye ni kod wach ni ji modak e pinyni. Omiyo un jo-Israel chikuru itu mondo uwinj ane gima owacho. Owacho kama: “Dimbruok kod hera onge e pinyni, kendo ji ok oyie kata mana kuom Nyasaye.
Gipenjo bao mondo onyisgi gima biro timore, kendo ludhe bende nyisogi wach ma gidwaro ng’eyo! Giseweya, mi gidhi ir nyiseche mamoko, mana ka dhako moweyo chwore to dwanyore gi chwo mamoko.
To ok nakumgi kuom timbegigo nimar un uwegi ema undhogoru gi mon ma jochode mag hekalu, kendo utimo ni Baal misengni kaachiel kodgi. To ‘Oganda mofuwo yudo masira’, mana kaka ngero wacho.
“Kata obedo ni un jo-Israel useweya, to da obedo maber ka jo-Juda ok otimo gima chal kamano. Kik udhi ulem Gilgal kata Bethel, kendo kik ukuong’ru kuondego e nying Ruoth Nyasaye mangima.