Amanu va Isareli, yeveleli ondaka ya Yehova, momo Yehova o kuete ondaka lolonungi viofeka. Vofeka ka mũli esunga, ndaño ohenda, ndaño ukũlĩhĩso wa Suku,
Omanu vange va kasi loku nyõlẽha omo va kamba ukũlĩhiso. Omo ove wa pukula ukũlĩhĩso wange, oco lamevo hu pukulavo okuti ku lingi vali ocitunda cange. Lomo wa ivalako ovihandeleko via Suku yove, lamevo njivalavo omãla vove.
Omanu vange va pinga pinga kociteka cuti, lombueti yavo yi va imbaimba onumbi. Momo utima wukahonga wa va lueyisa, kuenje va litepa la Suku yavo ha va lingi vakahonga.
Va lumbaila kilu liolomunda. Va timĩha insensu koviwulu vemẽhi liovilemba, momo undembo wavio uwa. Oco omãla vene vakãi va linga ovipuepue, kuenda olondombua viene vi limba kukahonga.
Si yambula omãla vene vakãi eci va linga ovipuepue, ndaño olondombua viene eci vi limba kukahonga. Momo alume lavovo va pambuka ha va kala lovipuepue, va lumbaila kumosi lolombaisi viefendelo liavo. Omanu ka va kuete olondunge va nyõlẽha.
A Isareli, ndaño ove muẽle o limba kukahonga, haimo Yuda ka ka pie. Ku ka ende ko Giligali. Ku ka lamane ko Betawene. Ku ka lisile, huti, Ndeci Suku o kasi lomuenyo.