×

Mara Bible BSI 2023

Hosea 6

1
“A vy teh u, Abeipa lâ kua heih suh u; Miah hriechheih khai ha hra sala, Miah a patlâh heih aw; Miah tuchheih ha hra sala, Miah a chahrypa heih aw.
2
Noh no khai tawhta miah pahrapa ta, Noh thôhna noh ta miah pathyu aw ta, A hmiakô liata eima hroh aw.
3
Abeipa pahnona chadai sih la, Ano cha pahno lymâ suh u; Khihdei awpa a siapa hawhta, Ano chhao â vaw luah tlai aw. Vâsua hawhta keimo lâ a vy aw ta, Châhvâ vâsua ta chhaohlei a padâpa hawhta â vy aw.”
4
Hy Epharai, kheihta ma ei cha tao aw? Hy Zudâh, kheihta ma ei cha tao aw? Nâmo phana cha my meihdo hawh dei châ ta, My diati thlai ta a paipa hawh dei a châ.
5
Chavâta hrohsopazy hmâpa ta tuchheih ei na ta, Ei pakah biezy ta ei thie ha ei; Ei hriena cha dôhla hawhta a pathli.
6
Atheihna khoh leipa na ta, Ngiachhiena ei khoh; Raopa hlâna châ leipa ta, Khazohpa pahnona ei khoh.
7
Âdâh hawhta biehraina parao ei ta, Cha liata eina dôvei ei.
8
Kilia cha hmoparaopazy khihpi châ ta, Thisaih lona ta a bie.
9
Hraotuhpazy ta chyhsa amâ byhpa hawhta, Theihthaipazy chhao ta ama tao hra; Sekhe lâpi liata chyhsa thie ei ta, Moleina pasichhih ngaitapazy ama tao.
10
Izarei o liata hmo chhiepa ei hmô; Cha liata Epharai ta sihryh ta, Izarei ta anosasyh â papuapalei.
11
Hy Zudâh y, ei phopi vânoh ei patosa heih tita, Nâma châta chhao sâh hria daihti raopa a châ.
Chin BSI Bible 2023
The Bible Society of India 2023
:
Save Notes