×

BIBULIYA ENTUKUVU

Koseya 6

1
“Mujje tudde eri Omukama, ye yatuyuzaayuza era y'anaatuwonya; yatulumya, era y'anaatusiba ebiwundu byaffe.
2
Mu nnaku bbiri ajja kutuzzaamu obulamu; ku lunaku olwokusatu alitusitula tubeerewo mu maaso ge.
3
Tumanye, tunyiikirire okumanya Omukama; ng'okusala kwa mmambya bwe kutalimba, n'okujja kwe kituufu bwe kuliba; alijja gye tuli ng'enkuba, ng'enkuba ya Ttoggo efukirira ensi.”
4
“Nkukolere ki, Efurayimu? Nkukolere ki Yuda? Okwagala kwammwe kuli ng'olufu lw'oku makya, oba ng'omusulo ogukeera okuggwaawo.
5
Kyennava mbatemaatema obulere nga mpita mu balanzi, ne mbatta n'ebigambo by'akamwa kange, anti ennamula yange yavaayo ng'ekimyanso.
6
Kubanga njagala kisa sso si kitambiro, kumanya Katonda, naye si bitambiro byokye.
7
Baamenya endagaano e Adamu, eyo gye baamenyera obwesigwa gye ndi.
8
“Gileyaadi kibuga ky'abakola obubi, kirinnyiriddwa n'omusaayi.
9
Ng'abatemu abateegeredde omuntu, n'ekikwanga kya bakabona bwe kiri, batemula abantu ku kkubo eriraga e Sekemu; nga bakola ekintu kya bugwenyufu!
10
Mu nnyumba ya Yisirayeli nalabamu ekyesisiwaza: eyo Efurayimu yessa mu bwamalaaya, ne Yisirayeli yeegwagwawazza.
11
Naye naawe Yuda, amakungula gakutegekerwa, bwe ndimala okuzza abasibe b'abantu bange.”
Luganda Bible
BIBULIYA ENTUKUVU SECOND EDITION The Bible Society of Uganda, 2018.
:
Save Notes