|
| 1 |
|
| «Israeele hursatenna galagalche duroo'mitanno gede assate hasi'reemmo yannara cubbinsanna saonsa xabbe leeltanno. Insa insanaawa kapho coyidhanno; mine unte moortanno. Garo kalaqidhe dooggate manna mulqidhanno. |
|
| 2 |
|
| Kayinnilla ani tenne bunshensa baalanta la"anni noommota horontanni diwodanchitino. Kunninni kainohunni uminsa cubbinni qoqqowantino; bushu loosinsa baalu albi'yanni dimaaxamino» yii. |
|
| 3 |
|
| Kaaliiqi, «Mannu, mootoolla awaawuratenni, roorrootano dogatenni hagiirsiisanno. |
|
| 4 |
|
| Insa aana ka'annori baalunku ammanantinokkireetinna foortannoreeti. Gibbonsa, tima ganannohu liinsoonni bullee shiishsha geeshsha dumbe agarroonni giira gedeete. |
|
| 5 |
|
| Mootensa jili barra, gashshaano lowota woyinete xajje agge dimbite dhiwantu. Tima ganannohuno haariimannosi mannira malaate leellishara angasi kayisi. |
|
| 6 |
|
| Gano ganate wodaninsa giirate booso gede iibbinoho. Hanqinsa hashsha wo'ma wiliilanni galanno; soodanno woyite kayinni bubbanno giira gede wala yaanno. |
|
| 7 |
|
| «Baalunku hanqunni giirate booso gede iibbite gashshaanonsa ittu; mootoollansano bado badontenni huntu. Kuni baalunku ikkanna, insa giddonni mittu nafa ane woshshi'rinohu dino» yii. |
|
| 8 |
|
| Kaaliiqi, «Israeelete manni dagate ledo karsamino. Insa galchiminokki timi gedeere ikkitino. |
|
| 9 |
|
| Allaggu wolqansa guddu; insa kayinni diwodanchitino. Geedhimma leellishate awuuwe fultinonsa; insa kayinni diwodanchitino. |
|
| 10 |
|
| Israeelete mannira uminsa adawarshi naqqasanno. Kuni baalu ikke hee'reennanni ane Kaaliiqi Maganinsawa dihiggino; horontanni dihasidhinoe. |
|
| 11 |
|
| Israeelete manni lembooli gede busulle afi'rinokkiha balala ikkino. Kunnira kaa'lo afi'rate mito woyite Gibitse dodanno; mito woyite Asoori buuwanno. |
|
| 12 |
|
| Ha'rantanno darga baalaho woshshaado'ya wore ceate gede asse amadeemmonsa. Loossinohu bushu loosinsa daafira qorichisheemmonsa. |
|
| 13 |
|
| «Anewiinni faffe hadhino daafira, insara aanne'e! Anera mokkookkitinoehura bao daggannonsa. Wonara ani gatisammonsara hasi'roommo. Insa kayinni ane kaphunni magansidhinoe. |
|
| 14 |
|
| Daallasinsa aana haabbe raartannota ikkinnina wodaninsanni anewa higge dihuuccidhanno. Gidenna woyinete xajje afidhara kayinni dagate gede bisonsa huduuxxitanni huuccidhanno; ane aanano mokkookkitanno. |
|
| 15 |
|
| Qajeelchoommonsahunna wolqansa jawaattanno gede assoommohu aneeti; insa kayinni anera gano gantino. |
|
| 16 |
|
| Anewiinni faffe kapho magansi'rate higgino; alaama so'rinohu shokkashshu digaani gede ikkitino. Roorrootinsano busha coye coyi'ratenni kainohunni bisetenni ganneenna reyitanno. Gibitsootuno qacifattannonsa» yii. |
|
|
|
|