Isirayɛlidenw, aw kana ɲanagwɛ kɛ, aw kana nisɔndiya i ko siya tɔw. Bari aw y'aw ka Ala to ka taga joow sɔn. Aw ye tɔnɔ min sɔrɔ sumangosiyɔrɔw bɛɛ la, o diyara aw ye.
U tena Masaba sɔn ni duvɛn ye tugu. U ka sarakaw tena diy'a ye. O bena kɛ u bolo i ko sangadumuni, ni minw bɛɛ y'o dumu, olu bɛɛ be nɔgɔ Ala ɲakɔrɔ. O dumuni nin le bena kɛ u ta ye, o tena don Masaba ka soo.
A ye, u be bolila halakili ɲa. Ezipiti jamana bena u kunbɛn, Manfisi dugu bena kɛ u kaburu ye! U ka nafolo marayɔrɔw bena fa ŋɔni la, ŋɔni bena falen u ka soow kɔnɔ.
Ɲagwan waati sera, kojugu juru sarawaati sera. Isirayɛli k'o lɔn! Kira kɛra i ko fatɔ aw ka kojugu caaman kosɔn. Ala ka dalaminɛ hakili ɲagamina aw ka juguya barika kosɔn.
Masaba y'a fɔ ko: «Ne ye Isirayɛlidenw ye, u tun be i ko * ɛrɛzɛn mɔnin, kongokolon kɔnɔ. Ne y'aw faaw ye, u tun be i ko toro deen fɔlɔw. Nga u tagara se Baalipewɔri dɔrɔn, u y'u yɛrɛ kalifa o maloyafɛn nin ma. O la, u kɛra fɛnjuguw ye i ko fɛɛn min koo ka di u ye.
Masaba y'a fɔ ko: «U ka juguya bɛɛ bɔra kɛnɛma Giligali dugu kɔnɔ le. O yɔrɔ la, u koo goyara ne ye. U ka kɛwalijuguw kosɔn, ne bena u gwɛn ka bɔ n ka yɔrɔ la. U koo tena diya ne ye tugu. U ɲamɔgɔw bɛɛ ye banbagaw ye.