Aw Israel-te u, hnam dangte kût hmangin Hlim ve bûng bûng suh u, Chu chu in Pathian laka uirena a ni. Hruihzâwl tina i nawhchizawrh hlawh chu i thlahlel a,
Lalpa hnênah uain an hlân lo vang a, An inthawinate chuan a tilâwm hek lo vang. Lusûnte ei ṭhin ang chaw an ei ang a, a ei apiang an bawlhhlawh ang. An chaw chu anmahni pumpuarna mai a ni ang a, Lalpa hnên a thleng lo vang.
Chhiatna lo thleng tlânsantute chu, Aigupta-ah an tlân khâwm ang a, Memfis hmunah phûm an ni ang. An tangka ro hlûte kangṭhaiin a bâwm ang a, An chênna inahte pawh hnimhlîngnei a khat ang.
Hremna ni chu a lo thleng ta, Sual man hmuhna ni chu. Israel-te u, hre teh u, In sual êm avâng leh in luhlul êm avâng zâwkin Zâwlnei chu, ‘mi â’ in ti a, Thlarau mi chu, ‘Mi â bawraw,’ in ti ṭhîn.
Israel chu thlalêrah khân grep angin ka hmu a, In pate pawh theipui hmin hmasa angin. Nimahsela, Peor tlânga Baal chu an pan a, An ngaihzâwng pathian tenawm tak ang chuan Zahpuiawm takin an awm ta a.
Gilgal-ah an sualna a hluar ṭan a, Tah chuan a ni ka huat tâk ni. An thil sual tihte avângin ka hmangaih tawh lo vang. An hruaitu zawng zawngin min helsan ta si a.