Yaa zĩ-boog raare, sawad-sabl daare, wulgu raare. La ade, tãb-biis n wate, ka tɛk wa sʋʋre, toos wa bõn-nindi, n maand lik wa yʋng sẽn lʋɩt tãms zutu. B zɩ n yãend a taare la b kõn le yãend ye.
Tãb-biisa wẽnda bugum sẽn widgi. Yaa bugum sẽn ka be sugri n ka basd bũmb a poorẽ ye. Bũmb ka tõe n põs-a ye. Bugma sẽn waa n nan ka widgi, tẽnga ra wẽnda Eden zẽedo, la a widgr poore, lebga zĩ-peen-daaga sẽn kẽesd rabeem.
Yaa waa b yɩkda tãnga n tɩ tiimd tãng a to zugu. B bʋʋrã wẽnda bilim-bilm sẽn digd zabre, bɩ bugum sẽn zom moogo t'a pusdẽ. Yaa tãb-biis sẽn tar pãnga n tong b zabr tongre n watẽ.
Soaala-Wẽnd lʋɩ-la b tãb-biisã taoore tɩ b koɛɛg sãta! Tãb-biisa sẽn zabd bãmb zabra me yaa ka tɛka la b tara pãnga. Soaala-Wẽnd daar yaa daar sẽn yɛɛsde, la sẽn na n paam-ba n põsã ka ye.
Ka sek tɩ y kẽes y fut ye, yaa y sũurã n tog n tedge.» Lɛɛg-y n wa y Soaala, y Wẽnnaama, nengẽ, tɩ b tara nonglem la nimbãan-zoeere, b sũura ka yãgd fudgr ye. B ka tõt b lebs b zelemde, n bas n ka sɩbg ye.
Bɩ maan-kʋʋdba, Wẽnd sõgen-kamba, wa ning nintãm wẽnd doogẽ, zãongã la maan-kugra sʋka. Bɩ b yeele: «Soaala-Wẽnde, zoe-y tõnd sẽn ya yãmb buuda neba nimbãanega. Ra bas-y y pʋɩɩrã ne yãnd ye, da bas-y tɩ bu-zẽmba wa laad tõnd n yetẽ: ‹Bãmba Wẽnda zĩi n maanda bõe?› »
Bɛ ninga sẽn yi-a nug goab n wa wã, m na rig-a. M na rig-a n zãage, m na tees-a zĩ-peen-daaga, m na tus a taoorẽ tãb-biisã n lub Yamsem Mogrẽ, n tus poorẽ dãmbã n lub Tẽnsʋk Mogrẽ. B na n põogame n bas yũug ned ba a ye sẽn ka rat t'a wẽ-a, la sẽn na n wulumd zĩig zãnga. Woto la m na n menes sẽn nams-b yãmb tɩ loogã.
Siõ kamba, kɩdem-y yã, lang-y Soaala y Wẽnnaama yĩnga! Tɩ y paama sẽoog saaga; b kõt-a-la yãmb t'a niid n zemsd wa pĩnda, b kɩtame tɩ koom le zoe, sapaolgo la sẽoogo, wa kʋdem wẽnnẽ.
N-ye! Maam, Naaba-Wẽnd, n yete: «M na n lebs-y-la menemeedã, sʋy wã la kalwaarã sẽn dɩ yʋʋmda pʋgẽ. Ad-y bãmb la tãb-biis niyns mam sẽn tʋm-b tɩ b wa zab ne yãmbã.