Ambyatýta opaite tetãme, ha aguerupáta ichupekuéra Josafat ñúme (vállepe), ha upépe ambojovakéta ichupekuéra, che retã Israel rehehápe, ha’ekuéra omosarambipa haguére ambue tetãnguéra apyte rupi, ha omboja’opa haguére che yvy, Israel retã,
ha che retãygua rehe oityva’ekue hikuái po’a jeporavo, ha ome’ẽ hikuái umi mitãkuimba’e peteĩ kuña reko vai repy rehe, ha mitãkuñakuéra víno ho’umíva rehe.
Ha Che avendéta avei pende ra’ykuéra ha pende rajykuéra Judayguakuérape, ha ha’ekuéra ovende jevýta umi Sabayguápe, peteĩ tetã mombyryetévape, upéva Che, pende Ruete, ha’éma.
Peikytĩ kyse ty’ãime (fóicepe), hi’ajupámagui ñemitỹnguéra. Peju ha pemboguejy pe parral’a ojehykue’ohápe, henyhẽma ha oñehẽma umi mba’yrúgui, iñañaitereíguima hikuái.
Peikuaa porãta Che ha’eha pende Ruete, pende Jára, Siónpe oikóva, che cérro aiporavova’ekuépe ha Jerusalen oikóta pe yvy poravopyre ramo, ha tetã ambueygua nombopoguymo’ãvéi ko táva kóvape.
Ha umi ára umívape umi cérro omondykyva’erã parral rykue, ha umi cérro ykégui osyryva’erã kamby, ha opaite Juda pegua yakãnguéra (arróyo) osyry porãva’erã; ha osẽta peteĩ yvu pende Ruete rogaguasúgui, ha ombohykuéta pe ñu Sitim pegua.