“Mwachi piigap Israel leenjin, ‘Ye igoitoi chii age tugul eng' okweek kagoochinet kogoochin Kamuktaindet ne Toroor, kogoitoi che po akwotisyek, che po tuuga ak che po neego.’
“Ngo kagoochinennyi ko po tiseiywot ne kibeelei ne po tuuga, kogoitoi kirgit ne libwoop. Ingokweri kwo emait ne kituiyechin si kochamak eng' taitap Kamuktaindet ne Toroor.
Yeityo koeeny kirgooto eng' taitap Kamuktaindet ne Toroor. Ingoip korotiik tisiik, weeriigap Aron, ak koisote kaptisisyet komoswek tugul, che mi ole neegitee kurgeetap emait ne kituiyechin.
Ago ingoun eng' peek tuguugap ke kobooto keelyekyik ak kobeel tisiindet kirgooto komugul eng' kaptisisyet. Niito ko tiseiywot ne kibeelei, kagoochinet ne punei maat, nyamdutyet ne anyiny eng' Kamuktaindet ne Toroor.
Ago ingoun tuguugap ke ak keelyek eng' peek. Ingogoito tisiindet panyeek tugul ak kobeel eng' kaptisisyet. Niito ko kagoochinet ne kibeelei, kagoochinet ne punei maat, nyamdutyet ne anyiny eng' Kamuktaindet ne Toroor.
Yeityo kogereer kopcheune aeng' kebebaikyik amat koobeesyo. Ingobeel tisiindet chooto eng' kaptisisyet eng' kweenik che mi ma. Niito kagoochinet ne kigoitoi kebeel, kagoochinet ne punei maat, nyamdutyet ne anyiny eng' Kamuktaindet ne Toroor.”