Ago tugul che ma tinyei kebebaik ak peerik eng' nyanjosyek anan ainoosyek, eng' tugul che pendote peek ak tyong'in tugul che saptos eng' peek, chooto ko che kiwechei eng' okweek.
Eng' chooto tugul omuuchi oam chu: chereng'endet ak alak che po ooreennyi, talamwet ne kiguure kimekwan ak che po ooreennyi, keteryat ak che po ooreennyi, ak talamwet ak che po ooreennyi.
Alak tugul che pendote mugungonikwak, eng' tyong'ik tugul che pendote keelyek tugul ang'wan, ko ng'woneen chooto eng' okweek; age tugul ne twaei poortap tyonyooto kame ko murwoniitu agoi koimen.
Ng'wanitu kiy age tugul ne ibutyin ne kagome eng' chooto, ngo kiy age tugul ne ki kiyae keetiik, anan ngor, anan mui, anan kuniet, kiy age tugul ne kiboisyee; nyolu kirooch peek ak murwoniitu agoi koimen, yeityo anyun koanyinyak.
Ak kiy age tugul ne ibutyin kebebertap poorto ne po tyondo ne kagome ko ng'wanitu. Ngo kapkoimaut, anan tereenik, kituei chooto amu ng'woneen. Ng'woneegitu chooto eng' okweek.
Ak ne amei panyeegap nooto kame ko ingomwet ngoroikyik ak murwoniitu agoi koimen. Ingomwet ngoroik ne ibei tyonyooto kame ak murwoon ineendet agoi koimen.
Kiy age tugul ne ichuute moet ng'wony ak ne punei keelyek ang'wan, anan age tugul ne tinyei keelyek che chaang', chooto tugul che ichuutegei ng'wony ko moam amu kiwechei.
Amu aa Kamuktaindet ne Toroor Kamuktaindeng'wong', otabaangei anyun ak oegu che tiliileen amu aa tiliil. Amomurwongei eng' kiy age tugul ne ichuutegei ng'wony.