“Kanị, omẹni ebẹhụ ọ rị a ẹhụ rị a chan ụchan eziẹ bụ o yini ihiẹn mighafe akpụkpọ-ẹhụ, nị ẹṅẹnrẹn rịn'a e ke chanma ụchan, onyẹ nchụn-ẹjan k'e bu onyẹ hụ ihiẹn ahụn rị ẹhụ che ụzọ ohu akp'ọhịn ẹsa.
Nke akp'ọhịn ẹsa onyẹ nchụn-ẹjan e lelezi ẹ: omẹni ihiẹn hụ e nwunmẹgụọ ọhụnma lẹni ọ bachenini, onyẹ nchụn-ẹjan k'e ku ẹ nị onyẹ ahụn hụ ọchan; ẹkpụkpa mmaka rọ. Onyẹ ahụn k'a sụrịrị ẹkwa a. Ọ sụgụ a, ọ rị ọchan.
onyẹ nchụn-ẹjan k'e lele ẹ: omẹni emu ahụn a ghagbarịgụọ a ẹhụ ile, o k'e ku ẹ nị onyẹ hụ rị ọchan. Ebe o mẹ ni wẹ ile e nwunmẹgụọ ọhụnma, ya wụnị ọ hụghọ ọchan.
Onyẹ nchụn-ẹjan sikọ d'e lele ẹ: omẹni ebe ile te channị e nwunmẹgụọ ọhụnma; onyẹ nchụn-ẹjan sikọ d'e ku ẹ nị onyẹ hụ emu rị a kụ hụ ọchan, hụnyẹ a rị ọchan.
Onyẹ nchụn-ẹjan k'e lele ẹ: ọ hụn a nị o mighafe akpụkpọ-ẹhụ, nị ẹṅẹnrẹn rịn'a a chanmagụọ ụchan, onyẹ nchụn-ẹjan k'e ku ẹ nị onyẹ hụ a rụgụọ; eje-emu akpụkpọ-ẹhụ jọgbu enwẹn ẹ a pụhagụọ ebẹhụ ihiẹn-ofifi hụ te rị.
Kanị, omẹni onyẹ nchụn-ẹjan e lelegụọ a, nị ẹṅẹnrẹn ọchan arịa, n'o mighafeni akpụkpọ-ẹhụ lẹni ebẹhụ te channị e nwunmẹgụọ ọhụnma, onyẹ nchụn-ẹjan sikọ d'e bu ẹ che ụzọ ohu akp'ọhịn ẹsa.
Nke akpọhịn ẹsa onyẹ nchụn-ẹjan e lele ebẹhụ, omẹni ọ bawayeni, o mighafeni akpụkpọ-ẹhụ, onyẹ nchụn-ẹjan hụ sikọ d'e ku ẹ nị onyẹ ahụn hụghọ ọchan. Onyẹ ahụn k'a sụrịrị ẹkwa a. Ọ sụgụ a, ọ rị ọchan.
Nke akpọhịn ẹsa o lele ẹ, omẹni mbu ahụn a bawayegụọ elu ẹkwa hụ mọbụ ihiẹn hụ wẹ kpa mọbụ tụ mọbụ akpụkpọ mọbụ ihiẹn ọwụlẹ wẹ gi akpụkpọ mẹmẹ, ya wụ nị eje-mbu jọgbu enwẹn ẹ rọ; ihiẹn hụ ọ ban a rụgụọ.
Wẹ sụgụ nwan mọbụ changụ ihiẹn hụ kun mbu, onyẹ nchụn-ẹjan sikọ d'e lele ẹ: omẹni mbu hụ rịkwọ k'ọ rị mbụ, ọsụọn'a ọ bawayeni, ya wụ ọ rụgụọ. Dụn a ọkụn, ọ sụọn'a azụụn ohu sụọ kun mbu hụ.
Kanị, omẹni ogẹn onyẹ nchụn-ẹjan gi lelezi ẹ hụnnị wẹ sụgụ a mọbụ changụ a, nị mbu ahụn a pụgụọ, o k'a dọkapụ ebe hụn kun mbu ẹkwa hụ mọbụ ihiẹn hụ wẹ gi akpụkpọ mẹmẹ mọbụ ihiẹn hụ wẹ kpa mọbụ tụ.
O mẹzikwọ nị mbu hụ a pụhazị ẹkwa hụ mọbụ ihiẹn hụ wẹ kpa mọbụ tụ mọbụ ihiẹn hụ wẹ gi akpụkpọ mẹmẹ, ya wụnị ọ rị a bawaye, wẹ k'a dụnpụ ihiẹn ọwụlẹ kun ụdị mbuni ọkụn.
Ịya wụ iwu wẹ gi e sọn ihiẹn kun mbu omẹni ẹkwa oruru-mmaka mọbụ nke linẹni mọbụ ihiẹn wẹ kpa mọbụ tụ mọbụ ihiẹn ọwụlẹ wẹ gi akpụkpọ mẹmẹ rọ; iwu ndịnị kẹ wẹ gi e ku nị wẹ rị ọchan mọbụ nị a rụgụọ wẹ.