Phawhpa hri tawhta pathaisa awpa cha, pavaw thisaih ta ei sari thia aw ta, ano cha pathaihpa ta phuah aw ta, pavaw hrohpa cha lyurâhpa lâ a pathlie aw.
“Pathaisa awpa chyhsa cha a chysiazy pasu aw ta, a hmi zydua a ngyu aw ta, ti ta a ngai a si aw ta, a pathaih ha aw. Cha khai tawhta riehmo lâ a ngia thei aw ta, châhrasala a poh o khôtho liata noh sari a y chy awpa a châ.
A noh sarina noh ta a luh sâ zydua, a kâhhmi nata a hmaohmi zydua nata a mokhitlâh hmi zydua â ngyu aw. A hmi zydua â ngyu khai awpa a châ. A chysiazy pasupa ta, ti ta a ngai a si aw ta, chatanachata a pathaih ha aw.
“A noh chariena noh ta mietakutaw chapawpa seina hnei leipa pô no, mietakutaw chanôpa kô khapa seina hnei leipa pô kha nata niepa hlâna châta viahdie dipa sathaw pahlaopa kachu su hrawh su thôh nata sathaw chhiehraôh ôh kha a hlâ aw.
Theihthaipa ta mietakutaw chapawpa pô kha cha sathaw byh chhaota la aw ta, thaileichâna hlâna châta hlâ aw ta, chaluahpa hlâna châta Abeipa hmiakô liata a chaluah aw.
Moleina hlâna nata raopa hlâna ama thie tyhna su, supathaihpa liata mietakutaw chapawpa cha a thie aw. Moleina hlâna cha theihthaipa tovyuh a châpa hawhta, thaileichâna hlâna chhao theihthaipa tovyuh a châ hra. Cha cha pathaih ngaitapa a châ.
Theihthaipa ta thaileichâna hlâna thisaih cha la aw ta, a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw.
Theihthaipa ta a ku liata sathaw laibâhpazy cha a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw. Chazy cha thaileichâna hlâna thisaih a thiapa chô liata a hnia thlu aw.
“Dyhchhiepa châ sala, a hneina ta a tloh leipa khiahta cha, mietaku chapawpa pô kha cheih aw ta, ano châta chatlaina tao nawpa ta, thaileichâna hlâna châta chaluahpa a châ aw. Niepa hlâna châta viahdie dipa sathaw pahlaopa kachu su hrawh su kha nata sathaw chhiehraôh ôh kha cheih aw ta,
vachhuh pô no tlyma, pivawtaw pô no tlyma, a hnei viapa thithaw cheih hra aw ta, pô kha cha moleina hlâna châta châ aw ta, ahropa cha raopa hlâna châta a châ aw.
“Chazy cha, phawhpa ta ano pathaisa nawpa ta, a noh chariena noh ta, theihthaipa lâ a cheih awpazy châ ta, ahmaohna poh o chhikao liata Abeipa hmiakô ta a cheih awpa a châ.
Cha khai tawhta theihthaipa ta thaileichâna hlâna mietakutaw cha a thie aw. Thaileichâna hlâna thisaih cha la aw ta, a pathaisa awpa nakao chachâh lâ pawhmao nata a chachâh lâ kupi nata pheipi zy liata a hnia aw.
Theihthaipa ta a ku liata sathaw cha a pathaisa awpa nakao chachâh lâ pawhmao nata a chachâh lâ kupi nata pheipi zy liata thaileichâna hlâna thisaih a hniana su chô liata a hnia thlu aw.
moleina hlâna châta pô kha hlâ aw ta, raopa hlâna châta pô kha, niepa hlâna chhaota hlâ aw ta, pathaisa awpa châta Abeipa hmiakô liata chatlaina a taopa aw.
O chhôh liata hmo a ypa zydua pathaih leipa a châ pathlei lei nawpa ta, theihthaipa ta hri moh awpa ta â ngia hlâta, o cha parua awpa ta bie a pie aw. Cha khai tawhta o moh awpa ta theihthaipa cha â ngia aw.
theihthaipa ta a ngia aw ta, a moh heih aw. Hri cha o liata a kawh via laih khiahta cha, a kawh theipa phawhpa hri o liata a ypa châ ta, o cha pathaih leipa a châ.
“Theihthaipa ta moh awpa ta a vy ta, hri cha o pamih pathipa a châ tawhta a kawh via laih leipa khiahta cha, theihthaipa ta o cha pathaihpa ta a phuah aw. Hri cha a pai hapa a châ.