“Izarei sawzy chho u la, ama hnohta hetana heta reih teh u: Chapaw ahy rai a chapaw châna tawhta hniah a pua khiahta cha, hniah cha pathaih leipa a châ.
He he chapaw châna tawhta hniah a puapa vâta pathaih leina ryhpa a châ: Hniah cha a pua pazao ngâ thlâh ha tlyma, â chalih ha tlyma, pathaih leipa a châ khai.
Hniah hneipa ta chyhsa pathaihpa pachih ta a pachhao khiahta cha, chyhsa pathaihpa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.
Hniah hneipa chyhsa ry lâta a ypa hmo a hriapa cha zâlâ taih pathaih leipa a châ aw. Cha hmozy a phaohpa cha a chysiazy pasu aw ta, ti liata a ngai a si aw ta, zâlâ taih pathaih leipa a châ aw.
Hniah hneipa ta ti liata a ku a si ha tua leipa ta a hriapa chyhsa cha, a chysiazy pasu aw ta, ti liata a ngai a si aw ta, zâlâ taih pathaih leipa a châ aw.
“Hniah hneipa cha a hniah tawhta a pathaih ha khiahta cha, ano pathaisana châta noh sari hmâh aw ta, a chysiazy pasu aw ta, chavah ti liata a ngai a si aw ta, chatanachata a pathaih ha aw.
A noh chariena noh ta, vachhuh pô no tlyma, pivawtaw pô no tlyma cheipa ta Abeipa hmiakô lâ vawh aw ta, ahmaohna poh o chhikao liata theihthaipa a hlâ aw.
“Chanô ta a chanô châna tawhta a puapa hnei sala, a puapa cha thi a châ khiahta cha, chanô hnopasupa vâta noh sari chhôh pathaih leipa châ aw ta, ahy rai ano a hriapa cha zâlâ taih pathaih leipa a châ aw.
Chapaw ta ano cha a ziakhei sala, a chanô thi lopa pathaih leina cha â hlao khiahta cha, cha chapaw cha noh sari chhôh pathaih leipa châ aw ta, â ziana rakhô maih pathaih leipa a châ aw.
“Chanô a hnopasu daihti tyhpa châ leipa ta, noh hluhpi hnopasupa ta ypa ta tlyma, a chanô hnopasu daihti tyhpa hlâta noh hluh via ta hno a pasu khiahta tlyma cha, a chanô hnopasu daihti tyhpa chhôh ta a pathaih leina yzie hawhna khata a hno pasu chhôh zydua a y hra aw, pathaih leipa a châ.
A hnopasu chhôh zydua ta â ziana rakhô maih cha, a chanô hnopasu pathaih leina daihti tyhpa liata a rakhô hawhta châ aw ta, â tyuna maih chhao, a chanô hnopasu pathaih leina daihti tyhpa liata a pathaih leipa hawhta pathaih leipa a châ aw.
Theihthaipa ta moleina hlâna châta pô kha, raopa hlâna châta pô kha hlâ aw ta, hnopasupa vâta a pathaih leina châta Abeipa hmiakô liata chatlaina a taopa aw.
“Cha hawhna chata Izarei sawzy cha ama pathaih leinazy tawhta na panano awpa ei a châ. Chataleipatala ama pathaih leina vâta, ama hry liata ei achhyna byureih papuapalei aw ei ta, ama thi pathlei aw.
chanô hnopasupa vâta a pathaih leipa châta ryhpa a châ hra. Chapaw chhao, chanô chhao, a chapaw châna nata a chanô châna tawhta a puapa a hneipa zydua châta ryhpa châ ta, chanô hnopasu chhôh ta a ziakheipa chapaw châta ryhpa a châ,” tah ta.