N'a sigira, walima ka la fɛɛn o fɛɛn kan, mɔgɔ o mɔgɔ mana maga o fɛɛn na, o tigi nɔgɔnin be to fɔɔ wulafɛ. Ni mɔgɔ min y'o fɛɛn nunu dɔ ta, o tigi k'a ka faniw ko ka jii ko, a nɔgɔnin fana be to fɔɔ wulafɛ.
«Banabagatɔ nin mana kɛnɛya, a k'a to tile wolonwula be tɛmɛ, a be sɔrɔ k'a yɛrɛ saniya, n'o dafara, a k'a ka faniw ko ani ka jii ɲanaman kɛ ka ko, a be saniya.
«Ni muso dɔ b'a ka landa la, ni joli be to ka bɔ a fari la, a nɔgɔnin be to a ka landa kosɔn fɔɔ tile wolonwula. Ni mɔgɔ o mɔgɔ magar'a la, o tigi nɔgɔnin be to fɔɔ wulafɛ.
Muso min joli be bɔn tile caaman kɔnɔ n'a ka landa waati tɛ, walima n'a joli be bɔn ka tɛmɛ a ka landa loon daa kan, a nɔgɔnin lo o waati nin bɛɛ kɔnɔ, i n'a fɔ a be cogo min na a ka landa waati la.
O waati bɛɛ kɔnɔ, n'a lara dilan o dilan kan, o be nɔgɔ i n'a fɔ a ka landa waati la. N'a sigira fɛɛn o fɛɛn kan, o fana nɔgɔra i n'a fɔ a ka landa waati la.
«Sariya min sigira cɛɛ ka nɔgɔ koo la, o le ye nin ye, dilan kan bana be mɔgɔ min na, ni jii be to ka bɔ a cɛya la, walima mɔgɔ min kɔji be bɔn a yɛrɛ ma, k'a tigi nɔgɔ,
walima muso min b'a ka landa la, ni joli, walima jii, be bɔn mɔgɔ min fɛ, cɛɛ, walima muso, ani cɛɛ min lara ni muso ye min nɔgɔnin be sariya faan fɛ.»