Xudan ji Mûsa re got: “Ji kekê xwe Harûn re bêje bila herdem neçe Cihê Herî Pîroz. Heke herdem pişt perdeyê û nêzîkî derxûnê ku li ser Sindoqa Peymanê ye biçe, wê bimire. Çimkî ez li ser derxûn, di nav ewran de xuya dibim.
Wê mîntanê kitan û derpiyên kitan li xwe bike, şûtikê kitan li nava xwe girê bide û şaşika kitan li serê xwe bipêçe. Ev kincên pîroz in. Wê bedena xwe bi avê bişo û wan li xwe bike.
Wê bixûrdankek ku bi perengên êgir ên ji ser gorîgehê tije kiriye û du destên ku bi bixûra bêhnxweş a ku hûr hatiye tijekirin, hilde derbasî pişt perdeyê bibe.
Wê ji xwîna conegê jî hilde û bi tiliya xwe bi ser derxûn ve û bi ser pêşiya derxûn ve bireşîne. Wê bi tiliya xwe heft caran li pêş derxûn xwînê bireşîne.
“Piştre wê ji bo gel nêriyê pêşkêşiya paqijiyê serjê bike, xwîna wî bibe pişt perdeyê û çawa ku bi xwîna conegê kir, wê xwîna nêrî jî bi ser derxûn ve û bi pêşiya derxûn ve bireşîne.
Bi vî awayî wê di ber qirêjiyên gelê Îsraêl de, di ber guneh û neheqiyên wan de, ji bo Cihê Herî Pîroz kefaretê bide. Wê ji bo Konê Hevdîtinê vê bike, çimkî di nava qirêjiyên mirovan de dimîne.
Di dema Harûn diçe Cihê Herî Pîroz û ji bo xwe, mala xwe û tevahiya civaka Îsraêl kefaretê dide de, heta ku ew derkeve derve, wê tu kes li Konê Hevdîtinê nemîne.
Paşê wê Harûn derkeve here gorîgeha ku li hizûra Xudan e û ji bo wê kefaretê bide. Wê ji xwîna conegê û ji xwîna nêrî hilde û seredor di qiloçên gorîgehê de bide.
Wê Harûn herdu destên xwe deyne ser serê nêriyê sax û li hemû neheqî, serhildan û gunehên gelê Îsraêl mikur bê. Bi vî awayî wê van bide ser serê nêrî û bi zilamekî ku ji bo vî karî hatiye tayînkirin, nêrî berde çolê.
Wê li dereke pîroz bedena xwe bi avê bişo û kincên xwe li xwe bike. Piştre wê derkeve, qurbanên şewitandinê yên ku ji bo wî û ji bo gel pêşkêş bike û ji bo xwe û gel kefaretê bide.
Wê conega û nêriyê ku wekî pêşkêşiya paqijiyê hatine pêşkêşkirin û xwîna wan ji bo kefaretdayînê anîne Cihê Herî Pîroz, derxin derveyî artêşgehê. Li wir wê rêx, eyar, goştên wan bê şewitandin.
Wê ev ji bo we bibe qanûneke herheyî. Salê carekê, ji bo tevahiya gunehên gelê Îsraêl kefaret bê dayîn.” Çawa ku Xudan li Mûsa emir kiriye, Harûn wiha kir.