«Mɔgɔ min ye sarakalasebagaw kuntigi ye a balimaw cɛma, tulu min be kɛ fɛɛn kan, o bɔnna ale min kunna, n'a bilara Ala ye ka se ka sarakalasefaniw don, o tigi man kan k'a to a kunsigi be ɲagami, a kan'a ka faniw faran fana.
Fiɲɛ be mɔgɔ min farikolo la, o tigi man kan ka gwɛrɛ k'o kɛ: fiɲɛntɔ, walima senkelennin, walima fiɲɛ be min ɲada la, walima mɔgɔ min farisogo yɔrɔ dɔ t'a cogo la,
Fiɲɛ be sarakalasebaga Arɔn kɔmɔgɔ o kɔmɔgɔ la, o si man kan ka gwɛrɛ ka sarakaw jɛni Masaba ye minw be jɛni pewu. Fiɲɛ b'a la minkɛ, o kama, a man kan ka gwɛrɛ ka Ala ka dumunifɛn d'a ma.
Nga fiɲɛ b'a la minkɛ, o la, a man kan ka gwɛrɛ soo cɛtigɛfani la, walima sarakabɔyɔrɔ la, ka ne ka sigiyɔrɔ nɔgɔ. Ne le ye Masaba, u saniyabaga ye.› »