Ginsugo sang Ginoo si Moises: “Singgana ang mga pari nga kaliwat ni Aaron nga wala sing pari nga magdagta sang iya kaugalingon paagi sa pagpakigbahin sa lubong kon ang isa sang iya mga pariente mapatay,
“Wala sing pari nga magkiskis sang bisan diin nga bahin sang iya ulo ukon magkorte sang iya bungot, ukon magpilas sang iya lawas sa pagpakita sang iya pagpangasubo.
Dapat sia manginbalaan kag indi niya pagpakahuy-an ang akon ngalan, kay nagadulot sia sa akon sing mga halad nga kalan-on paagi sa kalayo, kag kinahanglan manginbalaan sia.
Ang pari indi magpangasawa sang isa ka babayi nga sang una anay nagabaligya sang iya dungog ukon isa ka babayi nga indi na birhen ukon isa ka babayi nga ginbulagan, kay ang pari balaan.
Kinahanglan kabigon sang mga tawo nga ang pari balaan, tungod kay nagadulot sia sa akon sing mga halad nga kalan-on paagi sa kalayo. Ako amo ang Ginoo, ako balaan kag ginapakabalaan ko ang akon mga tawo.
“Ang Pinakamataas nga Pari, nga ginhaplasan sang lana ang iya ulo kag ginhalad sa pagsuksok sang mga bayu sang pari, indi niya pagpabay-an nga maggumon ang iya buhok ukon magisi ang iya mga bayu sa pagpakita sang iya pagpangasubo.
Ginhalad sia sa akon kag kinahanglan indi niya pagdagtaan ang iya kaugalingon ukon dagtaan niya ang akon balaan nga Tolda paagi sa pagbiya sini kag pagsulod sa isa ka balay nga may isa ka bangkay, bisan pa nga bangkay ini sang iya kaugalingon nga amay ukon iloy.
kag indi isa ka balo, ukon isa ka babayi nga ginbulagan, ukon isa ka babayi nga sang una anay nagabaligya sang iya dungog. Ang iya lamang pangasaw-on amo ang isa ka birhen nga babayi halin sa iya kaugalingon nga tribo.
Kay kon indi, ang iya mga kabataan, nga kinahanglan manginbalaan, mangindi-matinlo. Ako amo ang Ginoo kag ginpain ko sia subong nga Pinakamataas nga Pari.”
“Singgana si Aaron nga wala sing isa sang inyo mga kaliwat nga may depekto sa lawas nga magdulot sa akon sing halad nga kalan-on paagi sa kalayo. Ini pagatumanon sa tanan nga panahon nga palaabuton.
Ang amo nga sahi sang tawo sarang makakaon sang kalan-on nga ginhalad sa akon, ang balaan nga kalan-on nga ginhalad paagi sa kalayo kag ang tama ka balaan nga kalan-on nga ginhalad paagi sa kalayo,
pero, tungod kay may depekto sia sa lawas, indi sia magpalapit sa balaan nga kurtina ukon magpalapit sa altar. Indi niya dapat pasipakpakan ining balaan nga mga butang, tungod kay ako amo ang Ginoo kag ginapakabalaan ko ini.”