I adú ni kparakpara yo ziazia fu gayo Mbori, ka i agbárasa nga rimo gayo Mbori ya; bambiko i nafu amotumo na we fu Yekova, gu riahe nga ga gayo Mbori; si du i adú ti ni ni kparakpara yo ziazia.
Ka i aróga nga adebari watadu agu ade i agbarasi yo ya; ka i aróga nga agu ade akumbayo ambu yo ambu ya; bambiko boromotumo du ni kparakpara ko ziazia fu gayo Mbori.
Oni akpára ko, bambiko ko nafu gu riahe nga ga gaoni Mbori; ko adú wa kparakpara ko ziazia bangironi; bambiko mi nga Yekova nakpara roni ziazia, mi du ni kparakpara re ziazia.
“Gu boromotumo du ni gbia dagba awirinako, nga gu ko i auka nzeme ku riko yo, du ni kparakpara ko tipa ukadi roko boromotumo, ka ko nimbú nga mangeriko ni zakizaki he ni gbanga ha ya, ka ko nisíri nga gako aroko a ya;
ka ko nikúru nga rogo ziazia ba yo ku zegi yo ya, ka ko nigbárasi nga gu ziazia ba nga ga gako Mbori a ya; bambiko gu kparatise nga ga mbeda ko na nzeme nga ga gako Mbori du ri ko: Mi nga Yekova.
Dekurugbo, watadu gu ri i ambu ri ambu, watadu gu de i agbarasi ri, watadu debari, agi yo re ko ka roga nga yo ya; ono ko adía ngasu de kina dagba gako aboro,
Bambiko a nga boro sa du na serõ ka mbedi na bamotumo te, nga iravurari watadu gbarĩgbarĩ boro, watadu gu boro du na serõ kpakpuni yo watadu gu boro du gu pan, ni gbanga ha susi kura ha,
a nga boro sa dagba atita Arona yo nga boromotumo du na serõ nikambeda ka fu ga Yekova amotumo na we te; wa du ni na serõ, ni ayé nga ka mbeda ka fu gu riahe nga ga gani Mbori te.
ono ni aniye nga mbembedi ku pati roko kparakpara ba te, watadu mbeda na bamotumo a te, bambiko ni du na serõ, ya ka ni gbárasi nga gimi ziazia aba ya; bambiko mi nga Yekova nakpara yo ziazia.”