“ ‘Ow'omu zzadde lya Aroni, nga mugenge, oba alina okukulukuta kw'amazzi, talyanga ku biwonge ebitukuvu, okutuusa ng'amaze okulongoosebwa. Bw'akwatanga ku kintu ekyonoonese olw'okukoona ku mulambo oba ku musajja afulumizza amazzi ag'ekisajja, taabenga mulongoofu.
Era taabenga mulongoofu bw'alikwata ku kyewalula ekimufuula atali mulongoofu oba ku muntu atali mulongoofu, obutali bulongoofu bwe bubeere bwa ki oba ki.
Muwala wa kabona bw'abanga nnamwandu oba omugobe ewa bba, nga talina baana, abeera ewa kitaawe nga bwe yali mu buvubuka bwe, ayinza okulya ku mmere ya kitaawe. Omulala yenna owa bulijjo takkirizibwa kulyako.
“Gamba Aroni ne batabani be n'Abayisirayeli bonna nti: “ ‘Singa omu ku mmwe, ow'omu nnyumba ya Yisirayeli, oba omugwira asula mu Yisirayeli, abanga aweerezza ekitambiro ekyokye mu maaso g'Omukama olw'okutuukiriza obweyamo, oba ng'ekitambiro ekyeyagalire,
Ku kitambiro ekyeyagalire okyayinza okuweereza ente ennume oba endiga eŋŋongobavu oba eyakonvuba; kyokka ey'engeri eyo tekkirizibwa mu kitambiro eky'okutuukiriza obweyamo.
Temuweerezanga Mukama kisolo kyonna ng'enjagi zaakyo zizimbye, oba nga zaabetentebwa, oba nga zayasibwa, oba nga zaggyibwamu, oba nga zaasalibwako; era mu nsi yammwe ekyo temukikolanga n'akamu.