“Kabala ka Harun ban na'-ana'na: Patete mon ngoros sabarang se eatorragi bangsa Isra'il ka Sengko' malolo, sopaja ba'na ta' majuba'a Tang nyama se socce. Sengko' reya PANGERAN.
Mon sala settong dhari toronanna ba'na se teppa'na najjis nyander ka seddi'anna tor-ator se socce se bi' bangsa Isra'il eatorragi ka Sengko' malolo, oreng jareya ta' olle aladine pole e mezba. Atoran reya kodu eangguy salanjangnga. Sengko' reya PANGERAN.
Imam se najjis polana jareya, paggun najjis sampe' compet are. Ban saellana compet are gi' ta' olle ngakan kakanan se eatorragi ka Sengko' sabellunna mandhi.
Mam-imam kodu padha atoro' ka sakabbinna atoran se dhari Sengko'. Mon enja', mam-imam jareya sala, ban bakal mateya lantaran ta' atoro' ka atoran-atoran se socce. Sengko' reya PANGERAN, ban Sengko' se nantowagi mam-imam jareya kaangguy Sengko' malolo.
Tape mon babine' jareya la randha otaba etellak bi' lakena ban ta' andhi' ana', sarta abali ka bengkona eppa'na ban daddi tanggunganna imam jareya, olle ngakan kakanan bagiyanna eppa'na. Pera' ana' binena imam se olle ngakan kakanan se eatorragi ka Sengko'.
Mon oreng se banne ana' binena imam ta' etengnget ngakan kakanan se la eatorragi ka Sengko', oreng jareya kodu agante'e ka imam, etambai dhu polo persenna.
sabab mon tor-ator jareya epanneng ekakan bi' oreng se ta' andhi' ha', daddi najjis. Parkara jareya andaddiyagi oreng jareya sala ban madhateng okoman ka aba'na. Sengko' reya PANGERAN, ban Sengko' se masocce tor-ator jareya.”
“Kabala ka Harun ban ka na'-ana' sarta ka sakabbinna bangsa Isra'il atoran-atoran reya: Mon oreng Isra'il otaba oreng manca se apolong ban bangsa Isra'il ngatorragi kurban obbaran kaangguy ngessa'agi neyat otaba kaangguy kurban sokalella,
Keban se buta, se potong tolangnga otaba se loka, se etombuwi babudun se badha nanana, se nyandhang panyaket kole' otaba akorengan, ja' atorragi ka Sengko'. Keban se kantha jareya ja' atorragi ka Sengko' kaangguy kurban kakanan e mezba.
Keban se pellerra rosak polana takampe', loka, mesmes otabana ebuwang, ja' atorragi ka Sengko'. Ta' olle badha kadaddiyan se kantha jareya e nagarana ba'na.